ރައީސުލްޖުމްހޫރިއްޔާ އާއި އެމަނިކުފާނުގެ ނައިބު މަޤާމުން ވަކިކުރުމުގެ މަރުހަލާތައް ފަސޭހަވެގެންދާގޮތަށް ރައްޔިތުންގެ މަޖިލީހުގެ ޤަވާއިދުގެ، 49 ވަނަ މާއްދާއަށް ހުށަހަޅާފައިވާ އިޞްލާޙުތައް، ޢާންމު ކޮމިޓީން ދިރާސާކޮށް ނިންމިގޮތަށް ރައްޔިތުންގެ މަޖިލީހުން ފާސްކޮށްފިއެވެ.

މިއަދު ވޯޓުގަޑީގައި ރައްޔިތުންގެ މަޖިލީހުގެ ގަވާއިދުގެ 49 ވަނަ މާއްދާއަށް ހުށަހަޅާފައިވާ އިޞްލާޙުތައް، ޢާންމު ކޮމިޓީން ދިރާސާކޮށް ނިންމިގޮތުގެ ރިޕޯޓަށް ވޯޓަށް އެހުމުން އެއިސްލާޙް ފާސްކުރަން ފެންނަ ކަމަށް 40 މެމްބަރުން ވޯޓު ދެއްވި އިރު އެކަމާއި ދެކޮޅަށް ވޯޓު ދެއްވީ 21 މެމްބަރުންނެވެ. މިއާއެކު މަޖިލީހުގެ ޤަވާއިދަށް މިއައި ބަދަލާއިއެކު މަޖިލީހުގައި މިހާރު ދެމިތިބި މެމްބަރުންގެ ތިންބައިކުޅައެއްބަޔަކީ 54 މެމްބަރުންކަމުގައި ހަމަޖެހުނީއެވެ. ޤާނޫނު އަސާސީގައި ބަޔާންކޮށްފައިވާ ގޮތުން ރައީސުލްޖުމްހޫރިއްޔާ އާއި އެމަނިކުފާނުގެ ނައިބު މަޤާމުން ޢަޒުލްކުރެވޭނީ މަޖިލީހުގެ ތިންބައިކުޅަ ދެބައި މެމްބަރުންގެ ވޯޓު ލިބިގެންނެވެ. ރައްޔިތުންގެ މަޖިލީހުގައި މިހާރުވެސް އެމްޑީޕީގެ 56 މެމްބަރުން އެބަތިއްބެވިއެވެ. އެހެންކަމުން އެމްޑީޕީގެ ޕީޖީގުރޫޕުން ނިންމައިގެން އުނދަގުލެއް ނެތި ރައީސުލްޖުމްހޫރިއްޔާއާއި އެމަނިކުފާނުގެ ނައިބު މަޤާމުން ވަކިކުރެވިދާނެއެވެ. މިބަދަލު ރައްޔިތުންގެ މަޖިލީގުގެ ޤަވާއިދަށް ގެނައީ، ރައްޔިތުންގެ މަޖިލީހުގެ އިދާރީ 6 ދާއިރާއެއްގެ ގޮނޑިތައް ހުސްވުމާއި އަދި އެގޮނޑިތަކަށް މަޖިލީހުގެ މިދައުރުގައި މެމްބަރުން އިންތިޚާބު ނުކުރާނޭކަމުގައި އިލެކްޝަންސް ކޮމިޝަނުން ހާމަކޮށްފައި ވުމުންނެވެ.

އަލަށް ގެނައި އިސްލާޙްތަކުގައި، ރައްޔިތުންގެ މަޖިލީހުގެ ޤަވާއިދުގެ، 49 ވަނަ މާއްދާގެ ފަހަތަށް 3 އަކުރެއް ވަނީ އިތުރުކޮށްފައެވެ. މިއިސްލާޙްތައް ހުށައަޅުއްވާފައި ވަނީ ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު މުހައްމަދު ޝިފާޢުއެވެ.

ރައްޔިތުންގެ މަޖިލީހުގެ 49 ވަނަ މާއްދާގެ ފަހަތަށް އިތުރު ކުރި އަކުރުތައް:

49-(ކ) މިގަވާއިދުގެ ބޭނުމަށްޓަކައި، މަޖިލީހުގެ ޖުމުލަ މެމްބަރުންގެ އަދަދު ގުނުމުގައި ބަލާނީ އެވަގުތު މަޖިލީހުގެ މެމްބަރުކަމުގައި ދެމިތިބި މެމްބަރުންގެ ޖުމުލަ އަދަދަށެވެ.

49-(އ) ރައްޔިތުންގެ މަޖިލީހުގެ އުމުރު ހަމަވުމުގެ ސަބަބުން ނޫން ގޮތެއްގައި އެއްވެސް އިންތިޚާބީ ދާއިރާއެއްގެ ގޮނޑި ހުސްވެއްޖެނަމަ، އެ އިންތިޚާބީ ދާއިރާއެއްގެ ގޮނޑިއަށް މެމްބަރަކު އިންތިޚާބުކުރުމާއި ހަމައަށް، މަޖިލީހުގެ ޖުމުލަ މެމްބަރުންގެ އަދަދު ގުނުމުގައި އެއިންތިޚާބީ ދާއިރާއެއް ނުގުނޭނެއެވެ.

49-(ވ) ހިނގަމުންދާ ރައްޔިތުންގެ މަޖިލީހުގެ އުމުރެއްގައި، މަޖިލީހުގެ ޖުމުލަ މެމްބަރުންގެ އަދަދަށް އެއްވެސް ބަދަލެއް އައިސްފިނަމަ، އެބަދަލެއް އަންނަ ތާރީޚާއި ވިދިގެން އެންމެ އަވަހަށް ބާއްވާ މަޖިލީހުގެ ޖަލްސާއެއްގައި އެކަން އިސްލާޙް ކުރަންވާނެއެވެ.

މީގެ އިތުރުން ރައީސުލްޖުމްހޫރިއްޔާ އެމަނިކުފާނުގެ ނައިބުގެ މަޤާމުން ވަކިކުރުމާއި ގުޅޭ އިޖުރާއަތްތައް އަވަސްކުރުމަށް ރައްޔިތުންގެ މަޖިލީހުގެ ޤަވާއިދަށް ގެނައި އިސްލާޙްތަކުގެ ތެރޭގައި ހިމެނޭ 202 ވަނަ މާއްދާއަށް ގެނައި އިސްލާޙާއި 203 ވަނަ މާއްދާއަށް ގެނައި އިސްލާޙްވެސް އާއްމު ކޮމިޓީން ފާސްކުރި ރިޕޯޓް، ތުޅާދޫ ދާއުރާގެ މެމްބަރު ޙިސާއން ހުސައިން ހުށައެޅުއްވި އިސްލާޙްތަކާއިއެކު ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ ފާސްކޮށްފައެވެ. މިގޮތުން މަޖިލީހުން މިއިސްލާޙްތައް ފާސްކޮށްފައި ވަނީ، ރައްޔިތުންގެ މަޖިލީހުގެ 44 މެމްބަރުންގެ ވޯޓުންނެވެ. ޙިސާން ހުށައެޅުއްވި އިސްލާޙްތައް މަޖިލީހުން ފާސްކޮށްފައި ވަނީ، 45 މެމްބަރުންގެ އަޣުލަބިއްޔަތުންނެވެ. ހިސާންގެ އިސްލާހާއި ދެކޮޅަށް 10 މެމްބަރަކު ވޯޓުދެއްވިއެވެ.