ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަޤާމުން ޢަޒުލްކުރުމުގެ މައްސަލަ އެމްޑީޕީގެ ޕާލަމެންޓްރީ ގުރޫޕަށް ހުށައަޅުއްވާނެ ކަމުގައި އެމްޑީޕީގެ ޕާލަމެންޓްރީ ގުރޫޕްގެ މެމްބަރު އަދި ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު މުހައްމަދު ޝިފާއު ވިދާޅުވެއްޖެއެވެ.

ޝިފާޢު މިހެން ވިދާޅުވީ، ރައީސުލްޖުމްހޫރިއްޔާ އާއި އެމަނިކުފާނުގެ ނައިބު މަޤާމުން ޢަޒުލްކުރުން ފަސޭހަވާގޮތަށް ރައްޔިތުންގެ މަޖިލީހުގެ ޤަވާއިދަށް އިސްލާޙް ގެނައުމަށް ނިންމައި ރައްޔިތުންގެ މަޖިލީހުގެ އާއްމުކޮމިޓީ ފާސްކޮށްފައިވާ ރިޕޯޓުގެ ބަހުސް މަރުޙަލާގައި ވާހަކަފުޅު ދައްކަވަމުންނެވެ.

ޝިފާޢު ވިދާޅުވީ، މިއަދު މަޖިލީހުން ކުރަންޖެހޭ އެންމެ މުހިންމު މަސައްކަތަކީ ރައީސް އަޒުލުކުރުމުގެ މަސައްކަތްކަން، ކަށަވަރުގެ ޔަޤީންވާ ކަމަށެވެ. މިގޮތުން ސަރުކާރަށް މިވީ އެއް މަސްދުވަހުގެ ތެރޭގައި ސަރުކާރުން ޤާނޫނާއި ޚިލާފަށް ކޮށްފައިވާ ކަންކަން ޝިފާޢު ފާހަގަކުރެއްވިއެވެ. މީގެ އިތުރުން މިސަރުކާރުން ރައީސް ޔާމީނަކީ، ސަރުކާރަށް އޮތް ނުރައްކަލެއްކަމަށް ބަލައިގެން ޝަރުޢީ ދާއިރާއަށް ނުފޫޒު ފޯރުވަމުންދާކަމުގައިވެސް ޝިފާޢު ވަނީ ތުހުމަތުކުރައްވާފައެވެ.

ރައީސުލްޖުމްހޫރިއްޔާ އާއި އެމަނިކުފާނުގެ ނައިބު މަޤާމުން ޢަޒުލްކުރުން ފަސޭހަވާގޮތަށް ރައްޔިތުންގެ މަޖިލީހުގެ ޤަވާއިދަށް އިސްލާޙް ގެނައުމަށް ނިންމައި ރައްޔިތުންގެ މަޖިލީހުގެ އާއްމުކޮމިޓީ ފާސްކޮށްފައިވާ ރިޕޯޓުގެ ބަހުސް މަރުޙަލާގައި، އެމްޑީޕީގެ މެމްބަރުން އެއާއި އެއްކޮޅަށް ވާހަކަދެއްކި އިރު ދަޑިމޮކްރެޓްސްއަށް ނިސްބަތްވާ މެމްބަރުން ވާހަކަފުޅު ދެއްކެވީ އެކަމާއި ދެކޮޅަށެވެ.