މޯލްޑިވްސް ނޭޝަނަލް ޑިފެންސްފޯސްއިން ހުޅުމާލޭގައި ހަތިޔާރާއިއެކު ތަމްރީންތަކެއް ފަށައިފިއެވެ. މި ތަމްރީންތައް ގާތްގަނޑަކަށް 2 މަސް ދުވަހަށް ކުރިއަށްގެންދާނެކަމަށް ވަނީ ބުނެފައެވެ. 

އެމްއެންޑީއެފްއިން ބުނީ އެ ތަމްރީނު ފެށީ އިއްޔެ ކަމަށާއި އަންނަ ފެބްރުއަރީ މަހުގެ ނިޔަލަށް އެ ތަމްރީނު ކުރިއަށް ގެންދަން ނިންމާފައިވާ ކަމަށެވެ.

އެ ތަމްރީނުގައި ސިފައިން ހަތިޔާރާއެކު ހަރަކާތްތެރިވާނީ ހުޅުމާލޭގެ ބޭރު މަގުގެ ސަރަހައްދުތަކުގައި ކަމަށް އެމްއެންޑީއެފް އިން ބުނެއެވެ.

މީގެ ކުރިން ވެސް ސިފައިން ވަނީ މިފަދަ ތަމްރީނުތައް މާލޭގެ އެކި ސަރަހައްދުތަކުގައި ވެސް ކުރިއަށް ގެންގޮސްފައެވެ. އަދި އެފަދަ ތަމްރީނުތަކެއް އައްޑޫގައި ވެސް މިފަހުން ވަނީ ކުރިއަށްގެންގޮސްފައިވެއެވެ.

މީގެއިތުރުން މިމަހުގެ  23، 24 އަދި 25 ގައި ކ. ގިރިފުށީގައިވެސް ތަމްރީނެއް ކުރިއަށްގެންދިއުމަށް ހަމަޖެހިފައިވާކަމަށް އެމްއެންޑީއެފްއިން ވަނީ ބުނެފައެވެ. މި ތަމްރީން ކުރިއަށްދާނީ 19:00 އިން 22:30 އަށެވެ. މި ތަމްރީނުތަކުގައި ބޭނުންކުރާ ފުލެއާރސް އާއި ބަޑީގެ ވަޒަން ދަތުރުކުރާނީ ކ. ގިރިފުށީ ހުޅަނގު ދެކުނު ފަރާތުން 3000 މީޓަރ ދުރުމިނަށެވެ. އަދި ފުލެއާރސްއާއި ވަޒަން ދަތުރުކުރާނެ އުސްމިނަކީ 300 މީޓަރަށްކަމަށް އެމްއެންޑީއެފްއިން ވަނީ ބުނެފައެވެ.