ޕްރޮސެކިއުޓަރ ޖެނެރަލްގެ ވަކީލަކަށް ކުރާ ތުހުމަތުތަކާއި ގުޅުވައި، ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެމްބަރު، މުޙައްމަދު ނަޝީދު ރައްޔިތުންގެ މަޖިލީހުގެ މިއަދުގެ ޖަލްސާއަށް ކުއްލި މައްސަލައެއް ހުށައަޅުއްވައިފިއެވެ.

ނޮޅިވަރަމް ދާއިރާގެ މެމްބަރު، މުޙައްމަދު ނަޝީދު ހުށައެޅުއްވި އެކުއްލި މައްސަލައިގައި ގޮވާލާފައި ވަނީ ޕްރޮސެކިއުޓަރ ޖެނެރަލްގެ އޮފީހުގެ ވަކީލަކަށް ކުރާ ތުހުމަތުތަކާއި ގުޅިގެން އެކަންކަން ބަލައި ފިޔަވަޅު އެޅުމަށެވެ.

ނޮޅިވަރަމް ދާއިރާގެ މެމްބަރު، މުޙައްމަދު ނަޝީދު ހުށައެޅުއްވި މިކުއްލި މައްސަލަ މަޖިލީހަށް ބަލައިގަނެފައި ވަނީ 18 މެމްބަރުންގެ ވޯޓުންނެވެ.

މައްސަލަ މަޖިލީހަށް ހުށައަޅުއްވަމުން ނޮޅިވަރަމް ދާއިރާގެ މެމްބަރު މުހައްމަދު ނަޝީދު ވިދާޅުވީ، އެމައްސަލަ ކުއްލި މައްސަލައެއް ހުށައަޅުއްވާފައިވަނީ ދައުލަތުގެ ޕްރޮސެކިއުޓަރެއް، ދިނާއި ޚިލާފު އަދި އާއްމު އަޚްލާޤީ މިންގަނޑާއި ޚިލާފަށް އުޅޭ މަންޒަރު ފެންނަ ވީޑިއޯއެއް ދައުރުވަމުންދާއިރު، އެފަދަ އަމަލުތައް ދިވެހި މުޖުތަމައުގައި އިތުރުވެ ހުއްޓުވޭނެ ފިޔަވަޅެއް ނޭޅި އެއީ އާދައިގެ ކަންކަމަށް އެފަދަކަންކަން ވަމުންދާތީ ކަމަށެވެ.

މިމައްސަލައަށް ރައްޔިތުންގެ މަޖިލީހުގެ ތަޅުމުގައި ބަހުސްކުރެއްވީ މަޖިލީހުގެ ތިން މެމްބަރުންނެވެ.