ވަޒީރުންނަށް ރުހުން ދިނުމުގެ މައްސަލައަށް މިއަދު ވޯޓަށް ނޭހުމަށް މަޖިލީހުގެ ރައީސް ނިންމައިފިއެވެ.

މަޖިލީހުގެ ރިޔާސަތުގައި އިންނެވި މަޖިލީހުގެ ރައީސް މުޙައްމަދު އަސްލަމް މިގޮތަށް ނިންމެވީ، ރައްޔިތުންގެ މަޖިލީހުގެ ތުޅާދޫ ދާއިރާގެ މެމްބަރު، ޙިސާން ހުސައިން ނެންގެވި ނިޒާމީ ނުކުތާ ބަލައިގަނެ، އެކަމާއި ގުޅޭ ގޮތުން މަޖިލީހުގެ މެޖޯރިޓީ ލީޑަރާއި މައިނޯރިޓީ ލީޑަރާއި މަޝްވަރާކުރެއްވުމަށްފަހުގައެވެ.

ވަޒީރުންގެ މަޖިލީހުގެ މެމްބަރުންނަށް ރުހުން ދިނުމާއިގުޅޭ ގޮތުން، ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން ދިރާސާކުރުމަށްފަހު މަޖިލީހުގެ ތަޅުމަށް ފޮނުވި ރިޕޯޓް ފުރިހަމަ ނުވާތީ އެމައްސަލަ އަނބުރާ ކޮމިޓީއަށް ފޮނުވުމަށް ނިންމީކަމުަގައި މަޖިލީހުގެ ރިޔާސަތުން ވަނީ ޢިއުލާނުކޮށްފައެވެ.

ތުޅާދޫ ދާއިރާގެ މެމްބަރު ޙިސާން ހުސައިން ނިޒާމީ ނުކުތާ ނަންގަވައި ވިދާޅުވީ، ވަޒީރުންނަށް ރުހުން ދިނުމުގެ މައްސަލަ، މަޖިލީހުގެ މިއަދުގެ ޖަލްސާއަށް އެޖެންޑާކޮށްފައި ވަނީ، މަޖިލީހުގެ ޤަވާއިދާއި ޚިލާފްކަމެއް ކަމަށެވެ. އަދި އެއީ ފުރިހަމަ ނުވާ ރިޕޯޓަކަށްވާތީ، އެރިޕޯޓަށް މަޖިލީހުގެ ޖަލްސާއަށް އެޖެންޑާ ނުކުރެވޭނެ ކަމުގައި ހިސާން ވިދާޅުވިއެވެ.

މަޖިލީހުގެ މިއަދުގެ ޖަލްސާގައި، ވަޒީރުންނަށް ރުހުން ދިނުމުގެ މައްސަލަ ކުރިޔަށް ނުގެންދިޔުމަށް ނިންމައި، އެކަން މަޖިލީހުގެ ރައީސް އެކަން އިއުލާނުކުރެއްވުމާއި ގުޅިގެން މަޖިލީހުގެ ބައެއް މެމްބަރުން ވަނީ، އެކަމާއި ދެކޮޅަށް ނިޒާމީ ނުކުތާ ނަންގަވައި ވާހަކަފުޅު ދައްކަވާފައެވެ.