ގްލޯބަލް އޯގަނައިޒޭޝަން އޮފް ޕާލިމަންޓޭރިއަންސް އެގެއިންސްޓް ކޮރަޕްޝަން (ގޯޕެކް) ގެ ދިވެހިރާއްޖޭގެ ގޮފީގެ އެގްޒެކެޓިވް ކޮމިޓީ އިންތިޚާބުކޮށްފިއެވެ.

ރައްޔިތުންގެ މަޖިލީހުގެ ރައީސްގެ ޙައިސިއްޔަތުން މި ކޮމިޓީގެ މުޤައްރިރަކީ ރައްޔިތުންގެ މަޖިލީހުގެ ރައީސް މުޙައްމަދު އަސްލަމެވެ. އަދި ކޮމިޓީގެ ނައިބު މުޤައްރިރަކީ، މަޖިލީހުގެ މައިނޯރިޓީ ލީޑަރު އަޙްމަދު ސަލީމެވެ.

މިކޮމިޓީއަށް މެމްބަރުން އިންތިޚާބުކުރުމަށް ބޭއްވި އިންތިޚާބުގައި، އެކޮމިޓީއަށް ހޮވާފައިވާ މެމްބަރުންނަކީ، 

1. މީކާއީލު އަޙްމަދު ނަސީމް - ސެކްރެޓަރީ

2. އަޙްމަދު ޚައިތަމް - ޓްރެޜަރަރ

3. މުޙައްމަދު ރާޝިދު - ޢާންމު މެންބަރު

4. އަޙްމަދު ހާރޫން - ޢާންމު މެންބަރު

5. ޙުސައިން ޒިޔާދު - ޢާންމު މެންބަރު

ގްލޯބަލް އޯގަނައިޒޭޝަން އޮފް ޕާލިމަންޓޭރިއަންސް އެގެއިންސްޓް ކޮރަޕްޝަން (ގޯޕެކް) އަކީ، ޤަތަރުން އިސްވެ އުފައްދާފައިވާ އޯގަނައިޒޭޝަން އެކެވެ. މިއޯގަނައިޒޭޝަންގައި ރާއްޖެއިން ބައިވެރިވުމަށް ރައްޔިތުންގެ މަޖިލީހުން ފާސްކޮށްފައި ވަނީ، މިއަހަރުގެ މާރިޗު މަހުގެ 3 ވަނަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި އެޖަލްސާގައި ބައިވެރިވެވަޑައިގެންނެވި މެމްބަރުންގެ ތެރެއިން 43 މެމްބަރުންގެ އަޤުލަބިއްޔަތުން ފާސްކޮށްގެންނެވެ.