ރާއްޖޭގައި މަސައްކަތް ކުރާ ބިދޭސީންނާއި ގުޅޭ ގޮތުން މިނިސްޓްރީ އޮފް އިކޮނޮމިކް ޑިވެލޮޕްމެންޓްގެ ވެބްސައިޓްގައި ޝާއިއުކޮށްފައިވާ ރިޕޯޓްގެ އެކްސް ލިންކް ގެއްލިއްޖެއެވެ.

އެރިޕޯޓް މިނިސްޓްރީގެ އެކްސްއެކައުންޓުން ޕޯސްޓްކޮށްފައިވާ ލިންކް ގެއްލުނީ، ހަމައެކަނި ބަނގުލަދޭޝްއިން ރާއްޖެއަށް އަންސްކިލްޑް ލޭބަރުން ގެނައުމަށް ހުއްދަދިނުމާއި އެކު ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލްގެ ފާޑުކިޔުންތައް އަމާޒުވެފައި ވަނިކޮށެވެ. ފައްޔާޒު ވިދާޅުވެފައި ވަނީ، ސަރުކާރުގެ އެނިންމުމާއި މެދު ސުވާލު އުފެދޭ ކަމަށާއި އަދި އެއީ ޤާނޫނާއި ޚިލާފް ކަމެއް ކަމަށެވެ.

ވަޒީފާއާ ބެހޭ ޤާނޫނުގައި ވާގޮތުން ރާއްޖެއަށް ކޮންމެ ޤައުމަކުންވެސް ބިދޭސީ މަަސައްކަތްތެރިންގެ ގޮތުގައި އެންމެ ގިނަވެގެން އެތެރެ ވެވޭނީ އެއްލައްކަ މީހުންނަށެވެ. އިކޮނޮމިކް މިނިސްޓްރީން ހާމަކޮށްފައިވާ އެ ރިޕޯޓްގައި އެކި ޤައުމުތަކަށް ނިސްބަތްވާ ބިދޭސީ މަސައްކަތްތެރިން ރާއްޖޭގައި ވަޒީފާ އަދާކުރާ އަދަދުތައް ހާމަކޮށްފައި ހުރެއެވެ.

ކުރީގެ އިކޮނޮމިކް މިނިސްޓަރު ފައްޔާޒު އިސްމާއިލް އެކަން އާއްމުންގެ ސަމާލުކަމަށް ގެނެސް ބިދޭސީންނާއި ބެހޭ އެރިޕޯޓް ޑައުންލޯޑްކޮށް ސޭވްކުރުމަށް އެދިވަޑައިގެން އިކޮނޮމިކް މިނިސްޓްރީގެ އެކްސް ހޭންޑަލްގެ ލިންކް ހިއްސާކުރެއްވުމާއި އެކު އެލިންކް ވަނީ ގެއްލިފައެވެ.

އިކޮނޮމިކް މިނިސްޓްރީގެ އެކްސް އެކައުންޓުން ކުރިން ޕޯސްޓްކޮށްފައިވާ ރިޕޯޓްގެ ލިންކުން އެރިޕޯޓް މިހާރު ނުބެލުނަސް މިނިސްޓްރީގެ ވެބްސައިޓްގައި އަދިވެސް އެރިޕޯޓް އެބައޮތެވެ.

ފޮރިންގ ލޭބަރ ސްޓެޓިސްޓިކްސް އެންޑް އެކްޕެޓް ސިސްޓަމް ރިޕޯޓް 2023ގައި ވާގޮތުން، ރާއްޖޭގައި މިހާރުވެސް އެންމެ ގިނައީ ބަނގުލަދޭޝްގެ ލޭބަރުންނެވެ.

ރާއްޖޭގައި މަސައްކަތް ކުރާ ބިދޭސީންގެ އަދަދުތަކާއި ނިސްބަތް އެންމެ ގިނަ ފަސް ޤައުމު:

ބަނގުލަދޭޝް - 139،220 މީހުން

އިންޑިއާ - 94،533 މީހުން

ސްރީލަންކާ - 30،817 މީހުން

ނޭޕާލް - 11،814 މީހުން

ފިލިޕީންސް - 4،157 މީހުން

ރާއްޖެއަށް ލޭބަރުންގެ ގޮތުގައި ބަނގުލަދޭޝް މީހުން ގެނައުން ހުއްޓާލީ 2019 ވަނަ އަހަރުން ފެށިގެންނެވެ.