އިލެކްޝަންސް ކޮމިޝަނަށް ބޭނުންވާ ވަގުތީ ވަޒީފާތަކުގެ އިންޓަރވިއުއަށް ހާޟިރުވީ، 200 އެއްހައި މީހުންކަމުގައި އިލެކްޝަންސް ކޮމިޝަނުން ބުނެފިއެވެ.

ރިޔާސީ އިންތިޚާބާއި ގުޅޭ މަސައްކްތައް ކުރުމަށްޓަކައި، އިލެކްޝަންސް ކޮމިޝަނަށް ގާތްގަނޑަކަށް 296 މުވައްޒަފުން ބޭނުންވެއެވެ. އޭގެ ތެރޭގައި ހިމެނެނީ އެކި ފެންވަރުގެ 9 މަޤާމެވެ.

ރިޔާސީ އިންތިޚާބުގެ މަސައްކަތްތަކުގައި ހަރަކާތްތެރިވާނެ މުވައްޒަފުން ހޯދުމަށް އިއްޔެ އިންޓަރވިއު ކުރިޔަށް ގެންދިޔައީ ދަރުބާރުގޭގައެެވެ.

އިލެކްޝަންސް ކޮމިޝަނުން ބުނީ އިންތިޚާބަށް މީހުން ނަގާ މަޤާމުތަކަކީ އެކި ފެންވަރުގެ މަޤާމުތައް ކަމުގައި ވުމުން އެމަޤާމުތަކުގެ މުސާރަތައްވެސް ތަފާތުވާނެ ކަމަށެވެ. 

ކުރިޔަށް އޮތް ރިޔާސީ އިންތިޚާބަށް ކެންޑިޑެންސީ ހުށައެޅުމަށް އިލެކްޝަންސް ކޮމިޝަނުން ފުރުޞަތު ހުޅުވާލާނީ ޖުލައި މަހުގެ 23 ވަނަ ދުވަހުގައެވެ.

މިއަހަރުގެ ރިޔާސީ އިންތިޚާބުގެ ފުރަތަމަ ބުރުގެ ވޯޓުލުން އޮންނާނީ ސެޕްޓެމްބަރ 9 ވަނަ ދުވަހުގައެވެ.