ރާއްޖޭގެ ފަތުރުވެރިކަން ކުރިއެރުވުމަށްޓަކައި، ފަތުރުވެރިން ގެނެވޭނެ މަންޒިލްތަކަށް ޤައުމީ އެއަރލައިން 'މޯލްޑިވިއަން' އިން ސީދާ ދަތުރުތައް ފެށުމަށް 'ވައިޑް-ބޮޑީ އެއަރކްރާފްޓް އޮޕަރޭޝަން'ތައް ތަޢާރަފްކުރުމަށް ބޭނުންވާ ފައިސާ ސަރުކާރުން އެކުންފުންޏަށް ހޯދައިދިނުމަށް ނިންމައިފިއެވެ.

ވަޒީރުންގެ މަޖިލީހުން މިއަދު ނިންމި ނިންމުންތަކާއި ގުޅޭ ގޮތުން މީޑިއާތަކަށް މައުލޫމާތު ދެއްވަމުން ރައިސުލްޖުމްހޫރިއްޔާގެ އޮފީހުގެ ތަރުޖަމާނު މުޙައްމަދު ޝަހީބު ވިދާޅުވީ، 'ވައިޑް-ބޮޑީ އެއަރކްރާފްޓް އޮޕަރޭޝަން'ތައް ތަޢާރަފްކުރުމުގެ ގޮތުން އިންވެސްޓް ކުރަންޖެހޭ ފައިސާގެ އަދަދު، ފިނޭންސް މިނިސްޓްރީއަށް ލިބިފައިވާ ފައިނޭންސިން ފެސިލިޓީތަކުގެ ތެރެއިން އައިލެންޑް އޭވިއޭޝަން ސަރވިސް ލިމިޓެޑަށް ލިބޭނެ އިންތިޒާމް ހަމަޖެއްސުމަށް މިއަދުގެ ވަޒީރުންގެ މަޖިލީހުން ނިންމަވާފައިވާ ކަމަށެވެ.

އޮޕަރޭޝަނަލް ޚަރަދު ކުޑަކުރުމުގެ ގޮތުން ހަމަޖެއްސުމަށް ނިންމި ކަންކަން:

* އެންމެ ކުޑައަގެއްގައި ތެޔޮ ފޯރުކޮށްދިނުމާއި، ހޭންޑްލިންގ ނެވިގޭޝަން އަދި ލޭންޑިންގ އަދި ޕާކިންގައި އަގުހެޔޮކޮށްދިނުމާއި ގުޅޭކަންކަން މޯލްޑިވްސް އެއާޕޯޓްސް ލިމިޓެޑާއި މަޝްވަރާކުރައްވައިގެން ހަމަޖެއްސެވުން.

* މަންޒިލްތަކަށް އުދުހުމަށް ބޭނުންވާނެ އިންތިޒާމް ހަމަޖެއްސުމަށްޓަކައި އެޤައުމުތަކުން، ބޭނުންވާ އެހީތެރިކަން މިނިސްޓްރީ އޮފް ފޮރިން އެފެއާޒާއި މަޝްވަރާކުރައްވައިގެން ހޯދުން.

* މަޝްރޫޢުގެ ތެރޭގައި އެންމެ އިސްކަންދޭނެ މަންޒިލްތަކެއްގެ ގޮތުގައި ޗައިނާގެ މަންޒިލްތައް ހަމަޖެއްސުން.

* ޗައިނާއިން ބޭނުންވާ ޚާރިޖީ ގުޅުމުގެ ކަންކަން މިނިސްޓްރީ އޮފް ފޮރިން އެފެއާޒާއި ގުޅިގެން ހަމަޖެއްސުން.

ޚާއްސަގޮތެއްގައި ޗައިނާއިން ރާއްޖެއަންނަ ފަތުރުވެރިންގެ އަދަދު އިތުރު ކުރުމުގެ ގޮތުން ވައިޑް ބޮޑީ އެއާކްރާފްޓްގެ ދަތުރުތައް އިތުރުކުރުމަށް ވަޒީރުންގެ މަޖިލީހުން ނިންމި އިރު މިހާރުވެސް މޯލްޑިވިއަންއިން ޗައިނާގެ 2 މަންޒިލަކަށް ދަތުރުކުރަމުން ދެއެވެ.

މިކަމާއި ގުޅޭ ގޮތުން ރައީސުލްޖުމްހޫރިއްޔާގެ އޮފީހުން ވިދާޅުވީ، ރައީސުލްޖުމްހޫރިއްޔާ މި ގޮތަށް ނިންމެވީ މިއަދު ބޭއްވެވި ވަޒީރުންގެ މަޖިލީހުގެ ބައްދަލުވުމުގައި މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންއިން ހުށަހެޅުއްވި ކަރުދާހުގެ މައްޗަށް މަޝްވަރާ ކުރެއްވުމަށް ފަހުގައި ކަމަށެވެ.

އަދި ރާއްޖެއަށް އެންމެ ގިނަ ފަތުރުވެރިން އަންނަ ޤައުމުތަކަކީ އަދިވެސް ސީދާ ރާއްޖެއަށް ދަތުރުތައް އޮންނަ ޤައުމުތަކެއް ކަމާއި އެގޮތުން، 48 އިންސައްތަ ފަސިންޖަރުންނަކީ 'ކަނެކްޓިންގ' ފްލައިޓް މެދުވެރިކޮށް ރާއްޖެ އަންނަ ފަސިންޖަރުންކަންވެސް ސަރުކާރުން ފާހަގަކޮށްފައިވެއެވެ. 

ރައީސުލްޖުމްހޫރިއްޔާގެ އޮފީހުން ވިދާޅުވީ، މި މަޝްރޫޢުގެ މަސައްކަތް ފެށުމުން ޗައިނާ، ޔޫރަޕް، އަދި ސައުތު އެފްރިކާގެ ބައެއް ސަރަޙައްދުތަކަށް 'މޯލްޑިވިއަން' އިން ސީދާ ދަތުރުތައް (ނަން-ސްޓޮޕް ފްލައިޓްސް) ފެށިގެންދާނެއެވެ. މި މަޝްރޫޢުގެ ތެރޭގައި އެންމެ އިސްކަމެއް ދޭނެ މަންޒިލްތަކެއްގެ ގޮތުގައި ޗައިނާގެ މަންޒިލްތައް ވަނީ ހަމަޖެއްސަވާފައެވެ. އަދި، މި މަޝްރޫޢު ފެށުމާއެކު މަދުވެގެން ހަފުތާއަކު 2 ނުވަތަ 3 ދަތުރު ސީދާ އެ ސަރަޙައްދަކާއި ރާއްޖެއާ ދެމެދު ކުރެވޭނެ އިންތިޒާމްތައް ހަމަޖެހިގެންދާނެއެވެ.