މިހާރު ކުރިޔަށްދާ 10 ވަނަ ގައުމީ ހޭންޑުބޯޅަ މުބާރާތުގެ ފުރަތަމަ ޑިވިޝަނުގެ އަންހެން ބައިގެ ފައިނަލުން، އެންމެ ފަހުގެ ޗެމްޕިއަން އޮރިކްސް ހޭންޑް ބޯލް ކްލަބާއި ރެޑް ހޯކްސް ކްލަބް ޖާގަ ހޯދައިފިއެވެ.

އޮރިކްސް އިން މި އަހަރުގެ މުބާރާތުގެ ފުރަތަމަ މެޗުގައި ބައްދަލު ކޮށްފައިވަނީ، އެ ޓީމާ ދެކޮޅަށް ފައިނަލުގައި ނިކުންނަ ރެޑް ހޯކްސްއާއެވެ. މި މެޗު ރެޑްހޯކްސް ކާމިޔާބު ކުރީ 23-16 އިންނެވެ. ގްރޫޕް ސްޓޭޖުގައި ރެޑްހޯކްސް އާ ދެކޮޅަށް ނިކުތް ދެވަނަ މެޗުގައި އޮރިކްސްއިން ވަނީ ބަދަލު ހިފާފައެވެ. އެ މެޗު އޮރިކްސް އިން ކާމިޔާބުކުރީ 19-15 އިންނެވެ.

އަންހެން ފުރަތަމަ ޑިވިޝަން މުބާރާތުގައި 3 ޓީމު ވާދަކުރާއިރު، ގްރޫޕް ސްޓޭޖްގައި ކޮންމެ ޓީމެއް ކޮންމެ ޓީމަކާ ދެ ފަހަރު ބައްދަލު ކުރިއެވެ. އެގޮތުން މުބާރާތުގެ ފައިނަލް މި މަހުގެ 20 ވަނަ ދުވަހު ކުޅުމަށް ހަމަޖެހިފާއިވާއިރު، ގްރޫޕްގެ އެއްވަނަ ހޯދާފައިވަނީ 4 މެޗުން 3 މެޗު ކާމިޔާބުކުރި ރެޑްހޯކްސްއެވެ. އަދި ދެވަނައިގައި އޮތް އޮރިކްސްއަށް ވެސް ކާމިޔާބު ކުރެވުނީ ތިން މެޗެވެ. ނަމަވެސް، ރެޑް ހޯކްސް ކުރީގައި އޮތީ އެ ޓީމު ކާމިޔާބު ކޮށްފައިވާ ގޯލުގެ އަދަދު ގިނަ ކަމުންނެވެ.

ފުރަތަމަ ޑިވިޝަނުގެ އަންހެން ބައިގައި ދެން ވާދަކުރި ކީންސްއަށް އެއްވެސް މެޗެއް ކާމިޔާބު ކުރެވިފައެއް ނުވެއެވެ.