ޕަބްލިކް ޕްރޮސެކިއުޓާ އަހުމަދު ޝަފީއުގުޅޭ ގޮތުން ނޫސްތަކުންނާއި ސޯޝަލް މީޑިއާގައި ފަތުރަމުން އަންނަ ވާހަކަތައް އޭނާ ދޮގު ކުރައްވައިފިއެވެ.

ޝަފީޢުގެ ފޭސްބުކް ޕޭޖުގައި އޭނާ ލިޔުއްވި ޕޯސްޓެގައި ވަނީ، އޭނާ އާއި ގުޅޭ ގޮތުން މި ނިމުނު ހަފްތާގެ ތެރޭގައި ނޫސްތަކުންނާއި ސޯޝަލް މީޑިއާގައި ފެތުރި ވާހަކަތަކުގެ ތެރޭގައި ހިމެނޭ ފަސްކަމެއް ފާހަގަކުރައްވައި އެކަންކަން ދޮގުކުރައްވާފައެވެ.

ޝަފީޢު ވިދާޅުވީ، ކޮޓަރިއެއް ތެރޭގައި ޢާންމު އިޖްތިމާއީ މިންގަނޑާ ޚިލާފަށް ހުއްޓައި ބަޔަކު ވަދެ އޭނާގެ ގައިގާ ތަޅައިގަނެފިކަމަށް ބުނެ ފެތުރި ވާހަކަޔާއި، އޭނާގެ ބަރަހަނާ ވީޑިއޯއެއް ލީކްވެގެން އުޅޭކަމަށް ފެތުރި ވާހަކަޔާއި، ރަސޫލުކަމަށް އޭނާ ދަޢުވާކޮށްފި ކަމަސް ބުނެ ފެތުރު ވާހަކަޔާއި، ފުލުހުން އޭނާގެ މައްޗަށް ޖިނާއީ ތަޙުޤީޤެއް ހިންގަމުންދާކަމަށް ފެތުރި ވާހަކައިގެ އިތުރުން، ބަޔަކު އޭނާ ރަހީނުކުރިކަމަށާއި، އަދި އެކަމާ ގުޅިގެން ބަޔަކު ހައްޔަރު ކޮށްފައި ވާކަމަށްވެސް ފެތުރި ވާހަކަތަކަކީ ދޮގުވާހަކަތަކެއް ކަމަށެވެ. 

މިހާތަނަށް ޝަފީޢުއާ ގުޅޭ އެފަދަ އެއްވެސް މައްސަލައެއް ހުށައެޅިފައިވާ ކަމަށް ނުވަތަ އެފަދަ މައްސަލައެއް ބަލަމުންދާކަމަށް، ރަސްމީ އެއްވެސް ފަރާތަކުން ހާމަކޮށްފައި ނުވި ނަމަވެސް، ރާއްޖޭގެ ބައެއް ނޫސްތަކުން ވަނީ ޝަފީޢުގެ ފޮޓޯއާއި ވަނަވަރު ހިމަނައިގެން އެވާހަކަތައް ރިޕޯޓްކޮށްފައެވެ. 

މީހަކު ރަހީނުކޮށް މާރާމާރީ ހިންގި މައްސަލައެއްގައި 3 މީހަކު ހައްޔަރުކޮށް އެމީހުންގެ އެމީހުންގެ ބަންދުގެ މުއްދަތު ޖަހާފައިވާ ކަމަށް އިއްޔެ ފުލުހުން ހާމަކުރި އިރު، ބައެއް ނޫސްތަކުން އެކަން ޝަފީޢުއާ ގުޅުވައި ރިޕޯޓްކޮށްފައި ވީނަމަވެސް އެމައްސަލައިގައި ރަހީނު ކުރެވުނު މީހަކީ ޝަފީޢުކަމުގައި ފުލުހުން ހާމަކޮށްފައެއް ނުވެއެވެ. އަދި އެމައްސަލައިގައި އަނިޔާލިބުނު މީހާއާއި ހައްޔަރުކުރި މީހުންގެ ވަނަވަރެއްވެސް ފުލުހުން ހާމަކޮށްފައެއް ނުވެއެވެ.

ޝަފީޢުއަކީ، ރައީސް ޔާމީނުގެ މައްސަލައިގައި ދައުލަތުގެ ފަރާތުން ކޯޓުގައި ވަކާލާތު ކުރައްވާ ވަކީލެކެވެ. އޭގެ އިތުރުން ބޮޑެތި އެހެން މައްސަަލަތަކުގައިވެސް ޝަފީޢު ކޯޓުގައި ޕީޖީ ތަމްސީލްކުރައްވާއިރު ސިޔާސީ ފަރާތްތަކުންނާއި، ބައެއް ކުށްތަކަށް އަރައިގެންފައިވާ މީހުން އެމީހުންނާއި ދެކޮޅަށް ކުރެވޭ ދައުވާތަކުން ސަލާމަތްވުމުގައި އަމާޒަކަށް ޝަފީޢު ހަދާފައިވެއެވެ.