މާލޭ ސިޓިކައުންސިލް އިންތިޚާބުގައި ވާދަކުރާ، ކެންޑިޑޭޓުންގެ މެދުގައި ގުރުއަތު ނަގައި ކެންޑިޑޭޓް ނަމްބަރުތައް ތަރުތީބުކޮށްފިއެވެ.

ކެންޑިޑޭޓުންގެ ގުރުއަތު ނެގުން އޮތީ، މިއަދު ހެނދުނު 11 ޖެހި އިރު އިންތިޚާބާއި ބެހޭ މަރުކަޒު ދަރުބާރުގޭގައެވެ.

މާލޭ ސިޓީގެ މޭޔަރު އިންތިޚާބު ކުރުމުގެ ބައި-އިލެކްޝަންގައި، ކެންޑިޑޭޓް ނަމްބަރު ތަރުތީބު ކުރުމަށް ގުރުއަތު ނެގި އިރު، އިއްތިފާޤުން ކެންޑިޑޭޓް ނަމްބަރުތައް ތަރުތީބު ވެގެން ދިޔައީ، ކެންޑިޑޭޓުން އިލެކްޝަންސް ކޮމިޝަނަށް ކެންޑިޑެންސީވެސް ހުށައަޅާފައިވާ ތަރުތީބަށެވެ.

މާލެ ސިޓީގެ މޭޔަރުކަމަށް ވާދަކުރައްވާ ބޭފުޅުންގެ ތެރެއިން ކެންޑިޑޭޓް ނަމްބަރު 1 ލިބިވަޑައިގަތީ، އަމިއްލަ ގޮތުން ވާދަކުރައްވާ ޝުޢައިބު ޢަލީ އަށެވެ. ކެންޑިޑޭޓް ނަމްބަރު 2 ލިބިވަޑައިގަތީ، އަމިއްލަ ގޮތުން ވާދަކުރައްވާ ޙުސައިން ވަޙީދަށެވެ. ކެންޑިޑޭޓް ނަމްބަރު 3 ލިބިވަޑައިގަތީ، ސަރުކާރު ކޯލިޝަން ޕީޕީއެމް ޕީއެންސީގެ ޓިކެޓްގައި ވާދަކުރައްވާ އައިޝަތު ޢާޒިމާ ޝަކޫރަށެވެ. ކެންޑިޑޭޓް ނަމްބަރު 4 ލިބިވަޑައިގަތީ، އެމްޑީގެ ޓިކެޓްގައި ވާދަކުރައްވާ އާދަމް އާޒިމަށެވެ. އަދި ކެންޑިޑޭޓް ނަމްބަރު 5 ލިބިވަޑައިގަތީ، ދަ ޑިމޮކްރެޓްސްގެ ޓިކެޓްގައި ވާދަކުރައްވާ މުޙައްމަދު ސައިފް ފާތިޙްއަށެވެ.

މީގެ އިތުރުން މިއަދު ވަނީ، މާލޭ ސިޓީކައުންސިލްގެ މާފަންނު ދެކުނު ދާއިރާ އާއި މެދުހެންވޭރު ދާއިރާ އާއި ހެންވޭރު ދެކުނު ދާއިރާގެ ގޮނޑިއަށް ވާދަކުރައްވާ ކެންޑިޑޭޓުންގެ މެދުގައިވެސް ގުރުއަތު ނަގާފައެވެ.

މާލޭ ސިޓީކައުންސިލްގެ ބައި-އިލެކްޝަންގެ ވޯޓާއި، މާލޭ ސިޓީ މޭޔަރު އިންތިޚާބު ކުރުމަށް ބާއްވާ ބައި-އިލެކްޝަންގެ ވޯޓު ނެގުމަށް އިލެކްޝަންސް ކޮމިޝަނުން ހަމަޖައްސާފައި ވަނީ އަންނަ ޖެނުއަރީ މަހުގެ 13 ވަނަ ދުވަހެވެ.