Advertisement
މީހަކު އިންޓަރނެޓް ބޭނުން ކުރަނީ ---
ވަކިވަކި ބަރަހަނާ ވެބްސައިޓްތަކަށް ރާއްޖެއިން ނުވަދެވޭ ގޮތަށް ބްލޮކްކޮށްފި
ސަރުކާރުން ރާއްޖޭގެ އިންޓަރނެޓް ޚިދުމަތްދޭ ކުންފުނިތަކަށް އަންގައިގެން ވަކިވަކި ބަރަހަނާ ވެބްސައިޓްތައް ރާއްޖެއިން ނުވަދެވޭ ގޮތަށް ބްލޮކްކޮށްފިއެވެ.
އެނގިފައިވާ ގޮތުގައި، ކޮމިއުނިކޭޝަން އޮތޯރިޓީ އޮފް މޯލްޑިވްސްގެ އެންގުމަށް ރާއްޖޭގައި އިންޓަރނެޓްގެ ޚިދުމަތްދޭ ކުންފުނިތަކުން ވަނީ، އިއްޔެއިން ފެށިގެން ވަކިވަކި ބަރަހަނާ ވެބްސައިޓްތަކަކަށް ރާއްޖެއިން ނުވަދެވޭ ގޮތަށް ބްލޮކްކޮށްފައެވެ. މިގޮތުން އިންޓަރނެޓްގެ ޚިދުމަތްދޭ ކުންފުނިތަކުން ބަންދުކޮށްފައިވަނީ ސަރުކާރުން އެކުންފުނިތަކަށް ބަންދުކުރުމަށް އެންގި ފިލްޓަރުތަކެވެ.
ރާއްޖެއަކީ، އެއްވެސް ސެންސަރެއް ނެތި އިންޓަނެޓްގައި ހުރި ހުރިހާ ކޮންޓެންޓެއް އާއްމުންނަށް ބެލޭނޭހެން ހުޅުވާލާފައި އޮތް ދުނިޔޭގެ މަދު ޤައުމުތަކުގެ ތެރެއިން ޤައުމެކެވެ. މިހާތަނަށް އައިރު، އިންޓަރނެޓްގެ ޚިދުމަތް ހޯދުމުގައި ބަރަހަނާ ވެބްސައިޓްތައް ބްލޮކްކުރަން ބޭނުންވާ ފަރާތްތަކުން އެކަން ކުރަން ޖެހެނީ، އިންޓަރނެޓް ބޭނުންކުރާ ރައުޓަރު ބޭނުންކޮށްގެން އަމިއްލަ އަށެވެ. އަދި އިންޓަރނެޓްގެ ޚިދުމަތްދޭ ކުންފުނި މެދުވެރިކޮށް ވަކިވަކި ފަރުދުންނަށް އެފަދަ ވެބްސައިޓްތައް މީގެ ކުރިން ބަންދުކުރެވެނީ އިންޓަރނެޓްގެ ޚިދުމަތްދޭ ކުންފުނިތަކަށް ފީއެއް ދައްކައިގެންނެވެ.
ރާއްޖޭގައި ހަދާފައިވާ ނުރަސްމީ ދިރާސާއެއްގެ ނަތީޖާއިން ހާމަވެފައިވާ ގޮތުގައި، އޮރިޔާން ކޮންޓެންޓް ބެލުމާއި އެއަށް ދެވިހިފުމުގެ ނުރަނގަޅު އާދަ ރާއްޖޭގައި ވަރަށް ބޮޑަށް ފެތުރިފައިވެއެވެ. އޮރިޔާން ކާޑު އުފެއްދުމާއި، ގެންގުޅުމާއި ބެލުމަކީ ރާއްޖޭގެ ޤާނޫނުތަކުގައި އަދަބު ކަނޑައަޅާފައިވާ ކުށެއް ނަމަވެސް އެފަދަ މައްސަަލަތައް އޮތީ ވަރަށް ބޮޑަށް ދޫކޮށް ލާފައެވެ. އަދި މިއީ ރާއްޖޭގައި އިންޓަރނެޓްގެ ޚިދުމަތްދޭ ކުންފުނިތައް މެދުވެރިކޮށް އެފަދަ ވަކިވަކި ވެބްސައިޓްތަކަށް ނުވަދެވޭނެ ގޮތް ހެދި ފުރަތަމަ ފަަހަރެވެ.
