Advertisement
ޕީއެސްއެމްގެ ބަހުސްތައް ބާއްވާ ސްޓޫޑިއޯ --
މާލޭގެ މޭޔަރުކަމަށް ވާދަކުރާ ފަރާތްތަކުގެ ބަހުސް ޕީއެސްއެމްއިން ބާއްވަނީ
މާލޭގެ މޭޔަރުކަމަށް ވާދަކުރާ ފަރާތްތަކުގެ މެދުގައި އަންނަ މަހުގެ 6 ވަނަ ދުވަހު ބަހުސެއް ބޭއްވުމަށް ދައުލަތުގެ މީޑިއާ ޕީއެސްއެމްއިން ނިންމައިފިއެވެ.
ޕީއެސްއެމްއިން ހާމަކޮށްފައިވާ ގޮތުގައި މި ބަހުސްގައި، މާލޭސިޓީގެ މޭޔަރުކަމުގެ މަޤާމަށް ވާދަކުރައްވާ ހުރިހާ ކެންޑިޑޭޓުންވެސް ބައިވެރިވެވަޑައިގަންނަވާނެ ކަމުގެ ޔަޤީންކަން މިހާރު ވަނީ އެފަރާތްތަކުން ދެއްވާފައެވެ.
މާލޭ ސިޓީގެ މޭޔަރުކަމުގެ މަޤާމަށް ވާދަކުރައްވަނީ، ސަރުކާރު ހިންގާ ޕާޓީ ޕީއެންސީގެ ޓިކެޓްގައި ޢާޒިމާ ޝަކޫރާއި، އެމްޑީޕީގެ ޓިކެޓްގައި އާދަމް އާޒިމާއި، ދަ ޑިމޮކްރެޓްސްގެ ޓިކެޓްގައި ސައިފް ފާތިޙް އާއި، އަމިއްލަގޮތުން ވާދަކުރައްވާ ޙުސައިން ވަޙީދާއި ޝުޢައިބު ޢަލީއެވެ.
މާލެ ސިޓީގެ މޭޔަރުގެ މަޤާމަށާއި އަދި ކައުންސިލްގެ ދާއިރާތަކުގެ ގޮނޑިތަކަށް މެމްބަރުން އިންތިޚާބުކުރުމަށް ބާއްވާ އިންތިޚާބު އޮންނާނީ އަންނަ ޖެނުއަރީ މަހުގެ 13 ވަނަ ދުވަހުގައެވެ.
މާލޭގެ މޭޔަރުކަމަށް ވާދަކުރާ ފަރާތްތަކުގެ މެދުގައި ބަހުސެއް ބޭއްވުމަށް ދައުލަތުގެ މީޑިއާއިން ތައްޔާރުވަމުންދާއިރު ސަންގު ޓީވީންވެސް ދަނީ ބަހުސެއް ބޭއްވުމަށް ތައްޔާރުވަމުންނެވެ. ސަންގު ބަހުސް ބޭއްވުމަށް ހަމަޖައްސާފައި ވަނީ މިމަހުގެ 18 ވަނަ ދުވަހުގެ ރޭގައެވެ.
