ދަރިމައިވުމުގެ ފަރުވާގެ ޚިދުމަތް ދިނުމާގުޅޭ އުސޫލު ވަރަށް އަވަހަށް ޝާއިޢުކުރައްވާނެ ކަމުގައި، އެންސްޕާގެ ސީއިއޯ، ހީނާ ވަލީދު ވިދާޅުވެއްޖެއެވެ.

ދަރިމައިވުމާގުޅޭ (އިންފަރޓިލިޓީ) ފަރުވާގެ ޚިދުމަތްތައް އާސަންދަ ސްކީމް މެދުވެރިކޮށް ލިބޭނެ މަގު ފަހިކޮށްދިނުމުގެގޮތުން ހުސްނުވާ އާސަންދަ ސްކީމް ހިންގުމުގެ ގަވާއިދަށް 2 ވަނަ އިޞްލާޙުގެނެސް އެ ގަވާއިދު މިއަދު ވަނީ ގެޒެޓުކޮށްފައެވެ.

ހީނާ ވިދާޅުވީ، ރައީސް ޑރ. މުޙައްމަދު މުޢިއްޒުގެ ވައުދުފުޅާ އެއްގޮތަަށް ދަރިމައިވުމުގެ ފަރުވާގެ ޚިދުމަތް އާސަންދަ މެދުވެރިކޮށް ލިބިގެންދިއުމަކީ ވަރަށް ގިނަ ފަރާތްތަކަށް ލިބިގެންދާނެ ހިތްހަމަޖެހުމަކަށްވާނެ ކަމަށާއި، މިއީ ގިނަ ބަޔަކު ކުރަމުންދިޔަ އިންތިޒާރެއްގެ ނިމުން ކަމަށެވެ.

ދަރިމައިވުމާގުޅޭ (އިންފަރޓިލިޓީ) ފަރުވާގެ ޚިދުމަތްތައް އާސަންދަ ސްކީމްގެ ތެރެއިން ލިބިދޭން ފަށާއިި، އެޚިދުމަތް ދިނުމަށް އެކުލަވާލާ އުސޫލާއި އެއްގޮތަށް ކަމުގައި ސަރުކާރުން ވަނީ ބުނެފައެވެ. އަދި ސަރުކާރުގެ އަމާޒަކީ، އެފަދަ ފަރުވާތައް ކުރިޔަށް އޮތް އަހަރު ދުވަހުގެ ތެރޭގައި ސަރުކާރުގެ މައި ހޮސްޕިޓަލްގައި ފެށުން ކަމުަގައިވެސް ސަރުކާރުން މިއަދު ވަނީ ހާމަކޮށްފައެވެ.

ދަރިމައިވުމާއި ގުޅޭ މައްސަލަތައް ރާއްޖޭގައި ގިނަކަމަށް އަންހެނުންގެ ޚާއްސަ ބަލިތަކުގެ ޑޮކްޓަރުން ފާހަގަކުރައްވާފައި ވާއިރު، ފާއިތުވި އަހަރުތަކުގައި ދަރިމައިވުމާއި ގުޅޭ ފަރުވާތަކަށް އާސަންދައިގެ އެހީ ހޯދުމަށް 1100 ވުރެ ގިނަ މީހުން ހުށައަޅާފައިވާ ކަމުގައި އެންސްޕާއިން މައުލޫމާތު ދެއްވާފައިވެއެވެ.

ކުރީގެ ސަރުކާރުތަކުގައި ދަރިމައިވުމުގެ ފަރުވާތަކާއި ގުޅޭ ކަންކަމަށް އާސަންދަ އާއި އެންސްޕާގެ ތެރެއިން ކޮންމެވެސް މިންވަރެއްގެ އެހީއެއް ދެމުން އައި ނަމަވެސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅަކީ އާސަންދަ ކަވަރޭޖްގެ ތެރެއިން އެފަދަކަންކަމަށް ފުރިހަމައަށް ފަރުވާކުރެވޭނެ މަގު ތަނަވަސްކޮށްދިނުމެވެ.