އަލިފާނުގެ ހާދިސާތަކުން ރައްކާތެރިވުމުގައި، އެމްއެންޑީއެފް ފަޔަރ އެންޑް ރެސްކިޔު ސަރވިސް (އެފްއާރުއެސް)ގެ އޮޕަރޭޝަނަލް ޤާބިލުކަން އިތުރުކުރުަމަށް ކޮންމެ އަހަރަކު ބާއްވަމުން އަންނަ އެކްސަސައިޒް ޖައްރާފާ ފަށައިފިއެވެ.

އެމްއެންޑީއެފުން ހާމަކުރައްވާފައިވާ ގޮތުގައި، އެމްއެންޑީއެފް ފަޔަރ އެންޑް ރެސްކިޔު ސަރވިސް (އެފްއާރުއެސް)ގެ އޮޕަރޭޝަނަލް ޤާބިލުކަން އިތުރުކޮށް ފަޔަރ އިމަޖެންސީ އޮޕަރޭޝަން ޕްލޭންތަކާއި ހައިރައިޒާސް ސްޓޭންޑަރޑްސް އޮޕަރޭޝަން ޕްރޮސީޖަރ (އެސްއޯޕީ) އަށް އަހުލުވެރިވުމަށް ކުރިޔަށް ގެންދާ މިތަމްރީންތައް ފެށުމުގެ ގޮތުން މިއަދު މާލޭ ފަޔަރ ސްޓޭޝަންގައި ވަނީ ހާއްސަ ރަސްމިއްޔާތެއް ބާއްވާފައެވެ.

އެމްއެންޑީއެފް އެފްއާރުއެސްގެ ހުރިހާ ދާއިރާތަކެއްގައި މަސައްކުރާ ފަޔަރ ފައިޓަރުން ހިމެނޭހެން ކުރިއަށްގެންދާ މި އެކްސަސައިޒްގައި އެފްއާރުއެސްގައި ބޭނުންކުރާ އާލާތްތަކަށް އަހުލުވެރިކުރުވުމަށް، ތަފާތު ތަމްރީނުތަކާއި ޓޭބަލް ޓޮޕް އެކްސަސައިޒްތައް ކުރިއަށްގެންދިއުމަށް ވަނީ ހަމަޖެހިފައިވާ ކަމަށާއި، މީގެ އިތުރުން އުސް އިމާރާތްތަކުގައި ހިނގާފާނެ އަލިފާނުގެ ހާދިސާތަކުގައި ހަރަކާތްތެރިވާނެ ގޮތްތަކުގެ ފަރިތަކުރުންތައް ވެސް އެކްސަސައިޒްގެ ތެރެއިން ކުރިއަށްގެންދިއުމަށް ވަނީ ހަމަޖެހިފައިވާ ކަމުގައި އެމްއެންޑީއެފުން ހާމަކުރައްވާފައިވެއެވެ.

މި އެކްސަސައިޒްގެ މައިގަނޑު ތަމްރީންތައް ކުރިޔަށް ގެންގޮސްފައި ވަނީ މިއަދު ހަވީރު ހުޅުމާލޭ ހިޔާ ޓަވަރުތަކުގައެވެ.