ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ހަފުތާ 14ގެ ފުރަތަމަ ހަތަރު ހަފްތާގެ އަމާޒްތަކަށް ވާސިލްވެވިފައިވާކަަމަށާއި، ފުރަތަމަ 4 ހަފްތާގައި ކުރުމަށް ކަނޑައެޅުއްވި ކަންކަން ސަތޭކައިން ސަތޭކައަށް ނިންމާލެވިފައިވާ ކަމުގައި، އިއްޔެ ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސްޕަރސަންގެ މަޤާމަށް ޢައްޔަނުކުރެއްވި މުޙައްމަދު ޝަހީބު ވިދާޅުވެއްޖެއެވެ. 

ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި، ރާއްޖޭގެ މީޑިއާތަކަށް ހަފްތާ 14 އާއި ގުޅޭ ގޮތުން މައުލޫމާތު ދެއްވަމުން ޝަހީބު ވިދާޅުވީ، ސަރުކާރުގެ ހަފުތާ14ގެ މަސައްކަތް ފުރިހަމަ ކުރެވެމުންދާ މިންވަރު އަދާހަމަކޮށް ރައީސުލްޖުމްހޫރިއްޔާގެ އޮފީހުގެ ވެބްސައިޓުގައި މިއަދުން ފެށިގެން ހާމަކުރަމުން ގެންދަވާނެކަމަށެވެ. 

ސަރުކާރަށް މިހާތަނަށް ކުރެވިފައިވާ މަސައްކަތްތަކާއި ގުޅޭ ގޮތުން މަޢުލޫމާތުދެއްވަމުން ރައީސުލްޖުމްހޫރިއްޔާގެ އޮފީހުގެ އަންޑަރ ސެކްރެޓެރީ ފޮރ ޕަބްލިކް ޕޮލިސީ އަލްއުސްތާޛު މުޙައްމަދު ފިރުޒުލް ޢަބްދުﷲ ޚަލީލު ވިދާޅުވީ، ހަފުތާ14ގެ ފުރަތަމަ ހަތަރު ހަފްތާ ނިމުނުއިރު، ޖުމުލަ 17 ކަމެއް އެމުއްދަތުގެ ތެރޭގައި ކުރުމަށް ކަނޑައަޅާފައިވާ ކަމަށެވެ. 

މިކަންކަމުގެ ތެރޭގައި ނިމިދިޔަ ސަރުކާރުން އެހެންޤައުމުތަކާއެކު ވެފައިވާ ސިއްރު އެއްބަސްވުންތަކުގައި ރާއްޖޭގެ މިނިވަންކަމާއި ސިޔާދަތައް ނުރައްކާވާގޮތަށް ހުރި ނުކުތާތައް އުވާލުމުގެ މަސައްކަތް ފެށުމަށް ހަފުތާ14ގައި ހިމަނާފައިވާއިރު މިހާތަނަށް އެފަދައިން ފާހަގަކުރެވޭ އެއްބަސްވުންތަކުގެ ޢަދަދުތައް ސަރުކާރުން ހާމަކުރައްވާފައިވާކަން ފިރުޒުލް ފާހަގަކުރެއްވިއެވެ. ހަމައެހެންމެ، "މެމޮރެންޑަމް އޮފް އަންޑަސްޓޭންޑިންގ ފޮރ ކޯޕަރޭޝަން އިން ދަ ފީލްޑް އޮފް ހައިޑްރޯގްރަފީ ބިޓްވީން ދަ ގަވަރމަންޓް އޮފް ދަ ރިޕަބްލިކް އޮފް މޯލްޑިވްސް އެންޑް ދަ ގަވަރމަންޓް އޮފް ދަ ރިޕަބްލިކް އޮފް އިންޑިއާ" އެއްބަސްވުން އައު ނުކުރުމަށް ސަރުކާރުން ނިންމަވާފައިކަން ވެސް ފިރުޒުލް ފާހަގަކުރެއްވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ހަފުތާ 14ގެ ނަމުގައި ފުރަތަމަ 100 ދުވަހުގެ ތެރޭގައި ހާސިލްކުރާނެ ލަނޑުދަނޑިތަކެއް ކަނޑައަޅާފައި ވާއިރު، އަންނަ ހޮނިހިރު ދުވަހަކީ މިސަރުކާރަށް އެއްމަސް ފުރޭނެ ދުވަހެވެ.