ޕޫމާ އާއި އިޒްރޭލުގެ ފުޓުބޯޅަ އެސޯސިއޭޝަނާ ދެމެދު ހަދާފައިވާ ސްޕޮންސަރޝިޕް އެގްރީމެންޓް 2024 ގައި ނިމުމަކަށް ގެންނާނެކަމަށް، އެ ކުންފުނީގެ ތަރުޖަމާނު ހާމަކޮށްފިއެވެ. ނަމަވެސް މިއީ ފަލަސްތީނުގައި އިޒްރޭލުން ހިންގަމުންދާ ގަތުލުއާންމާ ގުޅުން ހުރި ނިންމުމެއް ނޫން ކަމުގައި ޖަރުމަނުގެ މަޝްހޫރު ކުޅިވަރު ބްރޭންޑުގެ ތަރުޖަމާނު ވަނީ ބުނެފައެވެ.

ޕޫމާއިން އިޒްރޭލުގެ ފުޓުބޯޅަ އެސޯސިއޭޝަނާއެކު ގުޅުން ބާއްވާތީ އެ ބްރޭންޑު ބޮއިކޮޓު ކުރުމަށް އެތައް ފަހަރެއްގެ މަތިން ގޮވާލާފައިވެއެވެ. ނަމަވެސް މި އަޑުތައް އަނެއްކާ ވެސް ގަދަވެފައިވަނީ، ފަލަސްތީނުގައި އިޒްރޭލުން މިހާރު ހިންގަމުންދާ ލާއިންސާނީ އަމަލުތަކާ ގުޅިގެންނެވެ.

ޕޫމާގެ ތަރުޖަމާނު އިތުރަށް ހާމަކޮށްފައިވާ ގޮތުގައި، އިޒްރޭލުގެ އިތުރުން، ސާބިއާގެ ފުޓުބޯޅަ ފެޑެރޭޝަނާ ދެމެދު ހަދާފައިވާ އެއްބަސްވުން ވެސް 2024 ގައި މުއްދަތު ހަމަވާނެއެވެ. ނަމަވެސް އިޒްރޭލެކޭ އެއްގޮތަށް، ސާބިއާގެ އެއްބަސްވުން ވެސް ދެން އައު ނުކުރާނެކަމަށް ބުނެފައިވެއެވެ. މިކަމުގެ ސަބަބެއް އެ ކުންފުނިން ހާމަކޮށްފައެއް ނުވެއެވެ.

އިޒްރޭލުގެ ފުޓުބޯޅަ ފެޑެރޭޝަނާއެކު އެ ގައުމުގެ ފުޓުބޯޅަ ޓީމުގެ ޖާޒީ ސްޕޮންސަރ ކުރުމަށް ޕޫމާއިން އެންމެ ފުރަތަމަ އެއްބަސްވުމަކަށް އައިސްފައިވަނީ 2018 ގައެވެ.

މި އެއްބަސްވުމާ ގުޅިގެން ޕޫމާ ބޮއިކޮޓް ކުރުމަށް އެންމެ ފުރަތަމަ ގޮވާލާފައިވަނީ އިޒްރޭލުގެ ފުޓުބޯޅަ ފެޑެރޭޝަނުން ގެންގުޅޭ ހަރުކަށި އުސޫލުތަކާ ގުޅިގެންނެވެ. އެގޮތުން، އިޒްރޭލުގެ ގައުމީ ފުޓުބޯޅަ ޓީމުގައި ހިމެނުމަށް އެ ގައުމުގެ ފުޓުބޯޅަ ފެޑެރޭޝަނުން ނިންމާފައިވަނީ ހަމައެކަނި ޖެވިޝް ކުޅުންތެރިންނެވެ.