އިންޑިއާއެކު ދިވެހިރާއްޖެއިން ހަދާފައިވާ ހައިޑްރޯގްރަފީ ސާރވޭގެ އެއްބަސްވުން އައު ނުކުރުމަށް ނިންމާފައިވާ ކަމުގައި ސަރުކާރުން ހާމަކުރައްވައިފިއެވެ.

ރައީސުލްޖުމްރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި، މިކަން ހާމަކުރައްވާފައި ވަނީ ރައީސުލްޖުމްހޫރިއްޔާގެ އޮފީހުގެ އަންޑަރ ސެކްރެޓެރީ ފޮރ ޕަބްލިކް ޕޮލިސީ އަލްއުސްތާޛު މުޙައްމަދު ފިރުޒުލް ޢަބްދުﷲ ޚަލީލެވެ.

ފިރުޒް ވިދާޅުވީ، އެއްބަސްވުމުގެ ސަބަބުން ރާއްޖޭގެ ސިޔާދަތަށް އަސަރު ކުރާކަަމަށެވެ. އަދި ރާއްޖޭގެ ކަނޑުފަޅުގެ ސިއްރުތަކަކީ ކުރިއްސުރެ ފެށިގެން ސަރުކާރުން ބޭރުގެ އެއްވެސް ފަރާތަކާއި ޙިއްޞާކުރާ ކަންކަން ނޫންކަމަށެވެ.

ފިރުޒުލް ވިދާޅުވީ، މިހާރު އޮތް އެއްބަސްވުމުގެ މުއްދަތު ހަމަ ވަނީ، އަންނަ އަހަރުގެ ޖޫން މަހުގެ 7 ވަނަ ދުވަހުގެ ނިޔަލަށް ކަމަށެވެ. އަދި އެއްބަސްވުމުގައި އޮންނަނީ އެއްބަސްވުން ނިމުމަކަށް ގެންނަނަމަ އެކަން ކުރިން އެންގުމަށް ކަމަށެވެ. އެހެންކަމުން އެއްބަސްވުން އާނުކުރާނެކަން މިހާރު އިންޑިއާ ސަރުކާރަށް އަންގާފައިވާ ކަމަށާއި، އެއްބަސްވުން ނިމުމަކަށް ގެނައުމުން ދިވެހި ސަރުކާރުން އެއްވެސް ބަދަލެއް ދޭން ނުޖެހޭނެ ކަމުގައިވެސް އޭނާ ވިދާޅުވިއެވެ.

ފިރުޒުލް ވިދާޅުވީ، ސަރުކާރުގެ ވިސްނުމަކީ ހައިޑްރޯގްރަފީ ސަރވޭތައް ދިވެހިރާއްޖެއިން އަމިއްލައަށް އެކަން ކުރުން ކަމަށެވެ. އަދި އަސްކަރިއްޔާގެ ތެރޭގައި އެފަންނުގެ ބޭފުޅުން އެބަ ތިއްބެވިކަމަށާއި ކައިރި މުސްތަޤުބަލެއްގައި ރާއްޖެއިން އަމިއްލައަށް އެކަން ކުރެވޭނެ މަގު ފަހުކުރެވޭނެ ކަމުގައިވެސް އޭނާ ވިދާޅުވިއެވެ.

ހައިޑްރޯގްރަފީ ދާއިރާއިން އިންޑިއާގެ ގުޅުން ބަދަހިކުރުމުގެ އެމްއޯޔޫއެއްގައި ދިވެހި ސަރުކާރާއި އިންޑިއާއާއި ދެމެދު ސޮއިކުރީ ޖޫން، 8، 2019 ގައި އިންޑިއާގެ ބޮޑުވަޒީރު ރާއްޖެއަށް ކުރެއްވި ދަތުރުގެ ތެރެއިންނެވެ.  

އަދި މޯލްޑިވްސް ހައިޑްރޯގްރަފިކް ސާވިސް ގެ ނަމުގައި ވަކި އިދާރާއެއް އުފައްދަވާފައި ވަނީ، 20 ޖެނުއަރީ 2022 ގައެވެ.

ހަޑްގްރޯފިކް ސާވޭތަކުގެ ސަބަބުން ދަތުރުކުރަން ބޭނުން ކުރާ އިލެކްޓޮރޯނިކް ނެވިގޭޝަނަލް ޗާޓްތައް އަޕްޑޭޓްކުރުމަށް ކަމުގައި ސަރުކާރުން ހާމަކުރައްވާފައިވެއެވެ.