މިއަހަރުގެ ޖުލައި މަހު ފުވައްމުލަކު ފަރުމައްޗަށް އުރުނު  "Olympic Kandilo"ނަކަމަށް ކިޔާ ބާޖު 100 މިލިޔަން ރުފިޔާއިން ޖޫރިމަނާކޮށް، އަދި އެއްމަސްދުވަހުގެ ތެރޭގައި އެފައިސާ ދެއްކުމަށް، އެންވަޔަރަންމަންޓަލް ޕްރޮޓެކްޝަން އޭޖެންސީ އީޕީއޭއިން، ޚަލާސްކުރުމަށް އެ ބާޖުގެ ވެރި ފަރާތްކަމުގައިވާ AFRICEAN PTE. LTD އަށް އީޕީއޭއިން އިއްޔެ އަންގައިފިއެވެ.

ފުވައްމުލައް އިރު-ދެކުނު ގޮނޑުދޮށް ޙިމާޔަތް ކުރުމުގެ މަޝްރޫޢަށް ބޭނުންވާ ހިލައިހިފައިގެން ދިޔަ އެބާޖު ފުވައްމުލަކުގެ ފަރުމައްޗަށް އުރިފައި ވަނީ، މިއަހަރުގެ ޖުލައި މަހުގެ 07 ވަނަ ދުވަހުގައެވެ. އެހާދިސާ އޮޅުވާލައި، ފަރަށް ނާރާކަމަށް ބުނެފައި ވީނަމަވެސް، ބާޖު ފަރަށް އެރިކަމާއި، ބާޖުން ފޭބި ހިލަތައް ފަރުމައްޗަށް އެޅި، ފުވައްމުލަކު ފަރުގެ 4306 (ހަތަރުހާސް ތިންސަތޭކަ ހައެއް) އަކަމީޓަރުގެ ސަރަޙައްދަކަށް ބޮޑެތި ގެއްލުންތަކެއް ލިބިފައިވާކަމަށް އީޕީއޭއިން ވަނީ ބުނެފަައެވެ.

މިމައްސަލައާއި ގުޅިގެން ފަރަށް ލިބުނު ގެއްލުންތައް ބަލައި ވަޒަންކޮށް ކަނޑައެޅުނު ޖޫރިމަނާއާއި ބަދަލުގެ އަދަދަކީ 162,745,500/-ރ (އެއްސަތޭކަ ފަސްދޮޅަސް ދެ މިލިއަން ހަތްލައްކަ ސާޅީސް ފަސްހާސް ފަސްސަތޭކަ ރުފިޔާ) ކަމުގައި ވީނަމަވެސް ޤާނޫނު ނަންބަރު: 4/93 (ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނު) ގެ ދަށުން ޖޫރިމަނާގެ ގޮތުގައި ކަނޑައެޅެން އޮންނަ އެންމެ ބޮޑު އަދަދަކީ ސަތޭކަ މިލިޔަން ރުފިޔާ ކަމުގައިވާތީ، އެކުންފުނި ޖޫރިމަނާކޮށްފައި ވަނީ 100 މިލިޔަން ރުފިޔާއިންނެވެ.

މީގެ އިތުރުން، ބާޖުގެ ފަރަށް އުރިގެން ފަރަށް ލިބިފައިވާ ގެއްލުމުގެ ބަދަލުގެ ގޮތުގައި ކަނޑައަޅާފައިވާ،  ޝަރީޢަތް މެދުވެރިކޮށް ހޯދުމުގެ މަސައްކަތް މި ޖޫރިމަނާއާ ގުޅިގެން އިސްތިއުނާފު މަރުޙަލާ ނިމުމުން އެޓާރނީ ޖެނެރަލް އޮފީހާ ގުޅިގެން ކުރިޔަށް ގެންދިޔުމަށް ނިންމާފައިވާ ކަމުގައިވެސް އީޕީއޭއިން ވަނީ ބުނެފައެވެ.