ޔޫރަޕިއަން ޗެމްޕިއަންސް ލީގުގެ ގްރޫޕް ސްޓޭޖުގެ ފަހުބުރަށް އައިއިރު އެންމެ ވާދަވެރި ގޮތަކަށް އޮތީ، މުބާރާތުގެ ގުރުއަތު ނެގިއިރުވެސް ގްރޫޕް-އޮފް-ޑެތުގެ ގޮތުގައި ބެލެވުނު ގްރޫޕް-އެފްއެވެ. މި ގްރޫޕުން އެންމެ ހިތްދަތި ގޮތަކަށް މުބާރާތާއި ވަކިވާން ޖެހުނީ ބުދަ ދުވަހުގެ ރޭ އެސީ މިލާން އަތުން ބަލިވެ އިނގިރޭސިވިލާތުގެ ނިއުކާސްލް ޔުނައިޓެޑެވެ.

ނިއުކާސްލްގެ ދަނޑުގައި ކުޅުނު މި މެޗަށް އެ ޓީމުން ނިކުތްއިރު، މުބާރާތުގެ ނޮކް-އައުޓް ބުރަށް ދިއުމުގެ ފުރުސަތު ވެސް އެ ޓީމަށް އޮތެވެ. އަދި މެޗުގެ ނަތީޖާ ހަމަހަމަވިނަމަ، ޔޫރޮޕާ ލީގުގެ ޕްލޭ-އޮފް ބުރުން ވެސް ޖާގަ ލިބޭނެއެވެ. ނަމަވެސް، ނަތީޖާ ނިކުތީ އެ ޓީމަށް އެންމެ ހިތްދަތި ގޮތަށެވެ. މެޗުގެ 33 ވަނަ މިނެޓުގައި ޖޯލިންޓަން ކާމިޔާބު ކޮށްދިން ގޯލާއެކީ، މެޗުގެ 86 ވަނަ މިނެޓާ ހަމައަށް ދިޔަ އިރުވެސް، ނިއުކާސްލް އޮތީ ޔޫރަޕުގެ ކޮންމެވެސް އެއް މުބާރާތެއްގައި ކުޅެވޭނެކަމުގެ އުއްމީދުގައެވެ. އެއީ މެޗުން މޮޅުވިނަމަ ޗެމްޕިއަންސް ލީގުގެ ރައުންޑް-އޮފް-ސިކްސްޓީން، އަދި އެއްވަރުވިނަމަ ޔޫރޮޕާ ލީގުގެ ޕްލޭ އޮފެވެ. ނަމަވެސް މިލާންގެ ޕުލިސިޗް 59 ވަނަ މިނެޓުގައި ޖެހި ގޯލުން ނަތީޖާ ހަމަހަމަވެފައި ވަނިކޮށް، އެ ޓީމުގެ ޗުކްވެޒޭ 84 ވަނަ މިނެޓުގައި މެޗުގެ އޮއިވަރު އަނބުރާލުމުން، މި ސީޒަންގެ ޔުރަޕިއަން ފުޓުބޯޅައަށް ނިއުކާސްލްއަށް އަލްވަދާއު ކިޔަން ޖެހުނީއެވެ.

މުބާރާތް ރަނގަޅަށް ފެށި ނަމަވެސް މި މެޗަށް އައިއިރު ނިއުކާސްލްގެ އެންމެ ބޮޑު ގޮންޖެހުމަކަށް ވެފައި އޮތީ ގިނަ ކުޅުންތެރިން ތަކަކަށް އަނިޔާވެފައި ވުމެވެ.

މެޗަށްފަހު ވާހަކަ ދައްކަމުން ނިއުކާސްލްގެ ކޯޗު އެޑީ ހޯވް ބުނެފައިވަނީ، އެ ޓީމުން ނިކުތީ ޗެމްޕިއަންސް ލީގުގައި ކުރިޔަށް ދިޔުމަށް ކަމަށެވެ. ނަމަވެސް މެޗުގެ ނަތީޖާ ނިކުތް ގޮތުން ވަރަށް ބޮޑު ހިތްދަތިކަމެއް ލިބިއްޖެކަމަށް ފާހަގަ ކުރިއެވެ. އަދި ކުރިޔަށް އޮތްތާ އެ ޓީމުން މަސައްކަތް ކުރާނީ، މި ނަތީޖާތަކުން ފިލާވަޅު ހޯދާ، އަންނަ ސީޒަނުގައި ޗެމްޕިއަންސް ލީގުގެ ޖާގައެއް ކަށަވަރު ކުރުމަށްކަމަށް ވެސް ހޯވް ފާހަގަ ކުރިއެވެ.

މި ގްރޫޕްގެ ދެވަނަ މެޗުގައި ބައްދަލުކުރީ ބޮރޫޝިއާ ޑޯޓްމަންޑާއި ޕީއެސްޖީއެވެ. މި މެޗު ނިމުނީ 1-1 އިން އެއްވަރުވެގެނެވެ. އަދި މި ނަތީޖާތަކާއެކީ ގްރޫޕްގެ އެއްވަނަ ޓީމުގެ ގޮތުގައި އަނެއް ބުރަށް ދިޔައީ ޑޯޓްމަންޑެވެ. ދެވަނައަށް ދިޔައީ ޕީއެސްޖީއެވެ. އަދި އެސީ މިލާން ދެން ކުޅޭނީ ޔޫރޮޕާ ލީގުގެ ޕްލޭ އޮފެވެ.