ރައީސް ނަޝީދުގެ ފިކުރެއްގެ ދިރުމާއި ގުޅިވަޑައިގެން ސަރުކާރާއި ދެކޮޅަށް މަސައްކަތް ކުރައްވަމުންދާ އެމްޑީޕީގެ މަޖިލިސް މެމްބަރުންގެ ތެރޭގައި ހިމެނޭ މެމްބަރުން، ކޮމިޓީތަކުގެ މުޤައްރިރުކަމުގެ ވަކިކުރުމުގެ މަސައްކަތް ފަށައިފިއެވެ.

ރައްޔިތުންގެ މަޖިލީހުގެ ކޮމެޓީތަކުގެ މުޤައްރަރުންގެ ގޮތުގައި ތިއްބަވައިގެން، ސަރުކާރާއި ދެކޮޅަށް މަސައްކަތް ކުރައްވަމުން ގެންދަވާ މެމްބަރުން، ކޮމިޓީތަކުގެ މުޤައްރިރުކަމުން ވަކި ކުރުމަށް އެމްޑީޕީގެ ޕާލަމެންޓްރީ ގުރޫޕުން ބުދަ ދުވަހު ވަނީ ނިންމާފައެވެ. އެގޮތަށް ނިންމާފައި ވަނީ އެމްޑީޕީގެ ޕާލަމެންޓްރީ ގުރޫޕުން ބުދަ ދުވަހު ބޭއްވި ބައްދަލުވުމުގައި ކަމަށް ވަނީ އެނގިފައެވެ.

އެމްޑީޕީގެ ރިޔާސީ ޕްރައިމަރީ ނާކާމިޔާބުވެ ވަޑައިގަތުމުން. ރައީސް ނަޝީދު ވަނީ އެމްޑީޕީގެ ތެރޭގައި ފިކުރެއްގެ ދިރުމުގެ ނަމުގައި ވަކި ފެކްޝަނެއް އުފައްދަވައިގެން މަސައްކަތްޕުޅު ކުރައްވަން ފައްޓަވާފައެވެ. މިގޮތުން ރައްޔިތުންގެ މަޖިލީހުގެ ތެރޭގަޔާއި ޕާޓީގެ ތެރެއިން ސަރުކާރަށް ފިއްތުންތައް ކުރިމަތި ކުރުވައި، 2023ގެ ރިޔާސީ އިންތިޚާބު އެމްޑީޕީއަށް ގެއްލުވާލުމަށް ރައީސް ނަޝީދު ގެންދަވަނީ ވަރަށް ފާޅުގައި މަސައްކަތް ކުރައްވަމުންނެވެ. މިގޮތުން ރައީސް ނަޝީދާއި އެކު ފިކުރެއްގެ ދިރުމާއި ގުޅިވަޑައިގެން ސަރުކާރާއި ދެކޮޅަށް އެންމެ ފާޅުކަން ބޮޑުގޮތެއްގައި އެންމެ އިސްކޮށް މަސައްކަތް ކުރައްވަމުން ގެންދަވާ ބޭފުޅުންގެ ތެރޭގައި ރައްޔިތުންގެ މަޖިލީހުގެ، ހެންވޭރު ހުޅަނގު ދާއިރާގެ މެމްބަރު ޙަސަން ލަޠީފާއި، މާފަންނު އުތުރު ދާއިރާގެ މެމްބަރު އިމްތިޔާޒު ފަޙްމީއާ، ކުޅުދުއްފުށީ އުތުރު ދާއިރާގެ މެމްބަރު، ޔާސިރު ޢަބުދުއްލަޠީފާއި، އަދި ހުޅުދޫ ދާއިރާގެ މެމްބަރު އިލްޔާސް ލަބީބު ހިމެނިވަޑައިގަންނަވައެވެ.

މިމެމްބަރުންގެ ތެރެއިން ޙަސަން ލަޠީފަކީ، ރައްޔިތުންގެ މަޖިލީހުގެ އާއްމުކޮމިޓީގެ މުޣައްރިރެވެ. އިމްތިޔާޒް ފަޙްމީ އަކީ، ރައްޔިތުންގެ މަޖިލީހުގެ ޖުޑީޝަރީ ކޮމިޓީގެ މުޣައްރިރެވެ. ޔާސިރު އަބުދުއްލަޠީފަކީ، ރައްޔިތުންގެ މަޖިލީހުގެ ސްލޫކީ ކޮމިޓީގެ މުޣައްރިރެވެ. އިލްުޔާސް ލަބީބަކީ ރައްޔިތުންގެ މަޖިލީޙުގެ ސްޓޭޓް އޯވންޑް ކޮމިޓީގެ މުޣައްރިރެވެ. މިހަތަރު ބޭފުޅުން ކޮމިޓީތަކުގެ މުޣައްރިރުންގެ މަޤާމުން ވަކިކުރުމަށް އެމްޑީޕީގެ ޕާލަމެންޓްރީ ގުރޫޕުން ނިންމާފައި ވީނަމަވެސް ރަސްމީ ސިފައެއްގައި އެކަން އަދި އެމްޑީޕީން ހާމައެއް ނުކުރެއެވެ.