އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖލީހަށް ހުށައެޅި ދައުލަތުގެ ބަޖެޓް ރައްޔިތުންގެ މަޖިލީހުގައި ވޯޓުގައި ބައިވެރިވެވަޑައިގެންނެވި މެމްބަރުންގެ އިއްތިފާޤުން މިއަދު ފާސްކޮށްފިއެވެ.

ބަޖެޓް ފާސްކުރުމަށް މަޖިލީހުގައި ވޯޓަށް އެހުމުން ވޯޓުގައި ބައިވެރިވެވަޑައިގެންނެވި، 68 މެމްބަރުންގެ އިއްތިފާޤުންނެވެ.

އަންނަ އަހަރަށް ލަފާކޮށް މިއަދު މަޖިލީހުން ފާސްކޮށްފައި ވަނީ، 49.8 ބިލިޔަން ރުފިޔާގެ ބަޖެޓެވެ.

ބަޖެޓް މަޖިލީހުން ފާސްކުރި އިރު، ސަރުކާރުން ހުށައެޅި ބަޖެޓަށް ބަޖެޓް ދިރާސާކުރި އިރު ވަނީ ބައެއް ބަދަލުތައް ގެނެސްފައެވެ. މިގޮތުން އެންމެ މުހިއްމު ކަމަކަށް ބަޖެޓުން ފާހަގަކުރެވިގެން ދިޔައީ، ރައީސުލްޖުމްހޫރިއްޔާގެ ރިޔާސީ ވައުދާއި އެއްގޮތަށް ފުށިދިއްގަރު ފަޅު އާބާދު ކުރުމަށްޓަކައި އެފަޅު ހިއްކުމަށް ބަޖެޓުގައި ސަރުކާރުން ހިމެނި 400 މިލިޔަން ރުފިޔާ އުނިކޮށް، އަދި 306 މިލިޔަން ރުފިޔާ އެހެނިހެން ދާއިރާތަކުންނާއި މަޝްރޫޢުތަކުން އިތުރުކުރުމަށްފަހުގައެވެ.

ބަޖެޓް ދިރާސާކުރުމުގެ މަރުހަލާގައި ފުށިދިއްގަރުފަޅު ހިއްކުމަށް ބަޖެޓުގައި ހިމެނިފައިސާ އުނިކުރުމުން ސަރުކާރާއި ސަރުކާރަށް ތާއީދު ކުރާ ފަރާތްތަކުން ވަނީ އެކަމަށް ނުރުހުން ފާޅުކޮށްފައެވެ.