ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދާއިއެކު ސިވިލްސަރވިސް ކޮމިޝަނުން ހަދާފައިވާ އެއްބަސްވުމާިއ ގުޅިގެން، ރައްޔިތުންގެ މަޖިލީހުގެ ގަވާއިދުގެ 170 ވަނަ މާއްދާގެ ދަށުން، ދާންދޫ ދާއިރާގެ މެންބަރު ޔަޢުޤޫބު ޢަބްދުﷲ ރައްުޔިތުންގެ މަޖިލީހަށް ކުއްލި މައްސަލައެއް ހުށައަޅުއްވައިފިއެވެ.

ފަސްޓް ލޭޑީ ސާޖިދާއާއެކު ސީއެސްސީން ހަދާފައިވާ އެއްބަސްވުން އުުވާލުމަށް ގޮވާލައި، ރައްޔިތުންގެމަޖިލީހަށް ކުއްލި މައްސަލަ ހުށައަޅުއްވަމުން، ދާންދޫ ދާއިރާގެ މެންބަރު ޔަޢުޤޫބު ޢަބްދުﷲ ވިދާޅުވީ، މަޖިލީހަށް އެމައްސަލަ ހުށައެޅުއްވީ، ސިވިލް ސަރވިސްގައި ހިމެނޭ 28000 ވުރެ ގިނަ މުވައްޒަފުންގެ ތެެރެއިން އެއްވެސް މުވައްޒަފަކު އިސްތިސްނާނުކޮށް، ހުރިހާ މުވައްޒަފުންގެ ކަންބޮޑުވުން އޮތް މައްސަލައެއް ކަމަށެވެ. އަދި އެކަމާއި ގުޅިގެން މިނިވަން މުއައްސަސާތަކާއި ބެހޭ ކޮމިޓީއާ ރައްޔިތުންގެ މަޖިލީހުގެ މެމްބަރުންނާއި ސިވިލް ސަރވިސްގެ މުވައްޒަފުންނާއި އަދި އެހެނިހެން ފަރާތްތަކުންވެސް އެކަމާއި މެދު ކަންބޮޑުވުން ފާޅުކުރައްވައި މެމްބަރުންނާއި ހަމައަށް އެކަމުގެ ޝަކުވާތައް އުފުލާފައިވާ ކަަމަށެވެ. މީގެ އިތުރުން އޭނާ ވިދާޅުވީ، އެމައްސަލައިގައި ކަންބޮޑުވުން އޮތް ސަބަބަކީ އެތަނަށް އެނަގާ މުވައްޒަފަކީ އާދައިގެ މީހަކަށްވުން ނޫންކަމަށާއި، އެއުޅެނީ ރައީސުލްޖުމްހޫރިއްޔާގެ އަނބިކަނބަލުން ހެލްތު މިނިސްޓްރީގެ ވަޒީފާއަކަށް ނަގައިގެން ކަމަށެވެ.

ދާންދޫ ދާއިރާގެ މެންބަރު ޔަޢުޤޫބު ޢަބްދުﷲ ވިދާޅިވީ، ހެލްތު މިނިސްޓްރީގެ ޕާމަނަންޓް ސެކްރެޓަރީވެސް ސިވިލް ސަރވިސް ކޮމިޝަނުގެ މެމްބަރުންވެސް، ހެލްތު މިނިސްޓަރުވެސް އެކަމާއި މެދު ނުރުހޭ ކަމަށާއި އެކަމަކީ، ފަސްޓްލޭޑީ މަޤާމުގެ ހައިސިއްޔަތާއި ބާރާއި ނުފޫޒު ބޭނުންކޮށްގެންކޮށްފައިވާ ކަމެއް ކަމަށެވެ. އަދި އެކަމުގެ ދަލީލަކީ،  ރައްޔިތުންގެ މަޖިލީހުގެ މިނިވަން މުއައްސަސާތަކާއި ބެހޭ ކޮމިޓީގައި ސިވިލްސަރވިސްގެ ރައީސް ދެއްކެވި ވާހަކަފުޅުކަމަށެވެ. އަދި އެއީ ޤާނޫނާއި ޤަވާއިދުތަކުގެ ބޭނުން ނުހަމަގޮތުގައި ހިފުންކަން މޭރުންވާ ގޮތުަގއި ސިވިލްސަރވިސް ކޮމިޝަންގެ ރައީސް ވާހަކަފުޅު ދައްކަވާފައިވާ ކަން މެމްބަރު ޔައުޤޫބު ފާހަގަކުރެއްވިއެވެ.

ޔައުޤޫބް ވިދާޅުވީ، ސިވިލސް ސަރވިސް ކޮމިޝަނުން، ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދަށް، ވޭޖް އެމްޕްލޯއީމެންޓް އެއްބަސްވުމެއްގެ ދަށުން ނޯޕޭލީވްވެސް ދީފައިވަނީ، ސިވިލްސަރވިސް ޤަވާއިދުގެ 177 ވަނަ މާއްދާގެ (ހ)ގެ 2 ނަމްބަރުގެ ދަށުން ކަމަށާއި އެއީވެސް ޤަވާއިދާއި ޤާނޫނާއި ޚިލާފު ކަމެއް ކަމަށެވެ.

ޔައުޤޫބު މަޖިލީހަށް ހުށައެޅުއްވި މައްސަލަ، 21 މެމްބަރުންގެ ވޯޓާއި އެކު މަޖިލީހަށް ބަލައިގަނެ މަޖިލީހުގައި ވަނީ ބަހުސް ފައްޓަވާފައެވެ.