މާލޭ ސިޓީގެ މޭޔަރުކަމުގެ މަޤާމަށް އެމްޑީޕީގެ ޓިކެެޓްގައި ވާދަކުރައްވާ އާދަމް އާޒިމް، ހުޅުމާލެއަށް ޒިޔާރަތްކުރައްވައި ހުޅުމާލޭގައި ދިރިއުޅޭ ރައްޔިތުންގެ ކަންބޮޑުވުންތައް އޮޅުންފިލުއްވައިފިއެވެ.

މިއަދު މެންދުރުފަހު އާޒިމް ވަނީ، ހުޅުމާލެއަށް ވަޑައިގެން ހުޅުމާލޭގައި ދިރިއުޅޭ ރައްޔިތުންނާއި ބައްދަލުކުރައްވާ، ރައްޔިތުންގެ ޝަކުވާތައް އަޑުއައްސަވައި، ހުޅުމާލޭގެ ކަންކަންކަމަށް ރައްޔިތުން ގެންނަން ބޭނުންވާ ބަދަލުތަކާއި ގުޅޭ ގޮތުން ޚިޔާލު ބަދަލުކުރައްވައި މަޝްވަރާކުރައްވާފައެވެ. މިގޮތުން އާޒިމްއާ ބައްދަލުވި އާއްމުރައްޔިތުންގެ ތެރެއިން ގިނަ ފަރާތްތަކުން ވަނީ، ހުޅުމާލޭގައި ދިރިއުޅުމުގައި ހުރި ގޮންޖެހުންތަކާއި ދަތިތަކާއި، އަދި އިތުރަށް ރަނގަޅުކުރަން ހުރި ކަންކަމުގެ ވާހަކަތައް އާޒިމްއަށް ދަންނަވާފައެވެ.

އެމްޑީޕީގެ ޓިކެޓްގައި މާލޭ ސިޓީގެ މޭޔަރުކަމުގެ މަޤާމަށް ވާދަކުރައްވާ އާދަމް އާޒިމްގެ އެންމެ މުހިއްމު އެއް ވަޢުދަކީ، ގުރޭޓާ މާލެ އޭރިޔާއަކީ މީހުން ދިރިއުޅޭ ހިތުން ދިރިއުޅޭ ހިތްފަސޭހަ ސިޓީއަކަށް ހައްދަވައި ދެއްވުމެވެ. މިގޮތުން މާލެ ސަރަހައްދުގައި އޮތް ތޮއްޖެހުމާއި ވެހިކަލް ޕާކިންގެ މައްސަލަތަކަށް ހައްލު ހޯއްދަވައި ދެއްވުމުގެ އިތުރުން މާލެ ސަރަހައްދުގައި ދިރިއުޅޭ އާއްމު ރައްޔިތުންނަށް އާމްދަނީ ލިބޭނެ އިތުރު މަގުތައް ފަހިކޮށްދެއްވުން ހިމެނެއެވެ.