ހދ. ޖުޑީޝަލް ދާއިރާގެ އިސްމެޖިސްޓްރޭޓް އަލްއުސްތާޛު އަލީ އާދަމް ފަނޑިޔާރުކަމުގެ މަޤާމުން ވަކިކޮށްފިއެވެ.

ޢަލީ އާދަމް މަޤާމުން ވަކިކޮށްފައި ވަނީ، އޭނާ އާއި މެދު ހުށައެޅުނު ސަުލޫކީ މައްސަލަ ބަލައި، އޭނާ މަޤާމުން ވަކިކުރަން ޖޭއެސްސީ ހުށައެޅުމާއި ގުޅިގެން އެމައްސަލަ ރައްޔިތުންގެ މަޖިލީހުގެ ޖުޑިޝަރީ ކޮމިޓީން ބަލައި، މަޖިލީހުގެ ތަޅުމުގައި މިއަދު ވޯޓު ނަގައިގެންނެވެ.

ޢަލީ އާދަމް މަޤާމުން ވަކިކުރުމަށް މިއަދު މަޖިލީހުގައި ނެގި ވޯޓުގައި، 45 މެމްބަރުންގެ ވޯޓުންނެވެ. އަދި އޭނާ މަޤާމު ވަކިކުރުމަށް ނުފެންނަކަމަށް ވޯޓު ދެއްވީ އެންމެ މެމްބަރެކެވެ.

ހދ. ޖުޑީޝަލް ދާއިރާގެ އިސްމެޖިސްޓްރޭޓް އަލްއުސްތާޛު އަލީ އާދަމް ފަނޑިޔާރުކަމުގެ މަޤާމުން ވަކިކުރުމުގެ މައްސަލަ ޖުޑީޝަލް ސަރވިސް ކޮމިޝަނުން ރައްޔިތުންގެ މަޖިލީހަށް ފޮނުވާފައި ވަނީ، ފޮނުވާފައި ވަނީ މިއަހަރުގެ ޖުލައި މަހުގައެވެ.

ޢަލީ އާދަމްގެ މަޤާމުން ވަކިކޮށްފައި ވަނީ، ހދ. ކުޅުދުއްފުށީ މެޖިސްޓްރޭޓް ކޯޓަށް ވަރިވުމަށް އެދި ހުށަހެޅި މައްސަލައެއްގައި ހިމެނޭ އަންހެނަކަށް ގުޅައި މެސެޖުކޮށް ހެދިކަން ކޮމިޝަންގެ ތަހުގީގަށް ސާބިތުވުމުންނެވެ. މިގޮތުން ޢަލީ އާދަމް ފަނޑިޔާރުކަމުގެ މަޤާމުން ވަކިކުރުމަށް ޖޭއެސްސީން ނިންމީ، މިއަހަރުގެ ޖުލައި މަހުގެ 23 ވަނަ ދުވަހު ބޭއްވި ކޮމިޝަންގެ ޖަލްސާގައެވެ. އަދި މިއަހަރުގެ މެއި މަހުގެ 25 ވަނަ ދުވަހުން ފެށިގެން އޭެނާ ވަނީ، މަސްއޫލިއްޔަތުތަކުން އެކަހެރިކޮށް ވަޒީފާއަށް ނުނިކުމެވޭގޮތަށް ސަސްޕެންޑްކޮށްފައެވެ.