ޢަރަބި ސަމިޓްގައި ސީރިއާގެ ރައީސް ބައްޝާރުލް އަސަދު ވާހަކަފުޅުދައްކަވަން ފެއްޓެވުމުން ޤަޠަރުގެ އަމީރު ޝެއިޚް ތަމީމް ބިން ހަމަދު އަލް ޘާނީ ސަމިޓް ދޫކުރައްވައި ނުކުންނަވައިފިއެވެ.

ޤަތަރުގެ ވަފުދާއިއެކު ޤަތަރުގެ އަމީރު ސަމިޓްދޫކުރައްވައި ނުކުންނެވިކަން ޤަތަރުގެ ރަސްމީ ފަރާތްތަކުންވެސް ވަނީ ކަށަވަރުކޮށްދީފައެވެ. ޤަތަރުގެ ރަސްމީ ބަޔާނުގައި ބުނެފައި ވަނީ، ޤަޠަރުގެ އަމީރާއި ވަފުދުގެ ބޭފުޅުން ޖިއްދާ ދޫކުރައްވައި ވަޑައިގެންނެވީ، ސަޢޫދީ ރަސްގެފާނާއި ސަޢޫދީ ވަލީއަހުދަށް މެސެޖެއް ދެއްވާފައި ކަމަށެވެ. އެމެސެޖުގައި ވިދާޅުވެފައި ވަނީ،  ޢަރަބިންގެ ލާބައާއި މަންފާއަށްޓަކައި ޢަރަބިން ގުޅިގެން އަޅާ ފިޔަވަޅުތައް ހަރުދަނާކުރުމަށް އެހީތެރިވެދޭނެކަމަށް އުއްމީދުކުރައްވާ ކަަމަށެވެ.

ޢަރަބި ލީގުގެ ސަމިޓްގައި، ޤަޠަރުގެ އަމީރު ޝެއިޚް ތަމީމް ބިން ހަމަދު އަލްޘާނީ ވާހަކަފުޅު ދައްކަވާފައެއްވެސް ނުވެއެވެ.

Advertisement

މިއަހަރަކީ 2010 ވަނަ އަހަރުގެ ފަހުން ސީރިއާގެ ރައީސް ބައްޝާރުލްއަސަދު ޢަރަބި ލީގުގެ ސަމިޓްގައި ބައިވެރިވެވަޑައިގަންނަވާ ފުރަތަމަ ފަހަރެވެ. ބައްޝާރުލް އަސަދު ސަޢޫދީ ޢަރަބިއްޔާއަށް ވަޑައިގެންނެވުމުން، ސަޢޫދީ ވަލީ އަޙުދު މުހައްމަދު ބިން ސަލްމާން ވަނީ، އަސަދާއި ބައްދަލުކުރައްވައި ސަޢޫދީ ސަރުކާރުގެ ފަރާތުން ހޫނު މަރުޙަބާއެއް ދަންނަވާފައެވެ.

ޢަރަބި ބަހާރުގެ ތެރޭގައި ސީރިއާގެ ރައްޔިތުން ބައްޝާރުގެ ވެރިކަމާއި ދެކޮޅަށް މުޒާހަރާތައް ފެށީ، ސީރިއާގެ ދާރާގައި ފުރާވަރުގެ ސްކޫލް ދަރިވަރުން ތަކެއް ބައްޝާރާއި ދެކޮޅަށް ސްކޫލުގެ ފާރުގައި ކުރެހި ގްރެފިޓީއެއްގެ މައްސަލައިގައި އެކުދިން ހައްޔަރުކޮށް ޖަލަށްލައި ޖަލުގައި އަނިޔާކޮށް އޭގެ ތެރެއިން ދެކުއްޖަކު މަރާލުމާއި ގުޅިގެންނެވެ.

2011 ވަނަ އަހަރު ސީރިއާގެ ދާރާއިން ފެށުނު މުޒާހަރާތައް މުޅި ސީރިއާއަށް ފެތުރު ދިމިޝްޤުގެ މަގުތައް ހަލަބޮލިވެގެން ދިޔުމުން މުޒާހަރާތައް ހުއްޓުވުމަށް އަސަދުގެ ސިފައިން އާއްމުންގެ ތެރެއަށް ބަޑިޖަހައި ކޮންމެ ދުވަހަކު އެތައް ބަޔަކު މަރަމުން ދިޔުމާއެކު، ސީރިއާގެ ސިފައިންގެ ތެރެއިން ބަޔަކު، މުޖާހިދުންގެ ގޮތުގައި ސީރިއާ ސަރުކާރާއި ދެކޮޅަށް ނުކުމެ ހަނގުރާމަ ފެށިއެވެ. ފަހުން ސީރިއާގައި ހިނގަމުންދިޔަ ހަނގުރާމައިގެ ތެރެއަށް ކުރުދީންނާއި، އައިއެސްއިންވެސް ވަދެގަތެވެ.

އަސަދުގެ ސިފައިންވަނީ ސީރިއާގެ އާއްމުންނާއި ދެކޮޅަށް ހަނގުރާމައިގެ އެތައް ޖަރީމާއެއް ހިނގާފައެވެ. ސީރިއާގެ ދާޚިލީ ހަނގުރާމައަށް 12 އަހަރުވިއިރުވެސް އަދިވެސް އަސަދުގެ ސިފައިންނަށް މުޅި ސީރިއާގެ ކޮންޓްރޯލެއް ނުލިބެއެވެ.