ރައްޔިތުންގެ މަޖިލީހުގައި ވަޒީރުންނާއި ސުވާލު ކުރުމުގައި މިހާތަނަށް ހިނގަމުން އައި ޤާނޫނާއި ޤަވާއިދާއި ޚިލާފް ޘަޤާފަތް ހުއްޓަވާލައްވައި، އެކަން ނިމުމަކަށް ގެންނެވިކަން ރައްޔިތުންގެ މަޖިލީހުގެ ރައީސް މުޙައްމަދު އަސްލަމް އިއުލާނު ކުރައްވައިފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި، މަޖިލީހުގެ ރައީސް މުޙައްމަދު އަސްލަމް ވިދާޅުވީ، މަޖިލީހުގައި މެމްބަރުންނަށް ވަޒީރާއި އިތުރު ސުވާލު ކުރެވޭނީ، މަޖިލީހަށް ވަޒީރު ޖަވާބު ދެއްވުމަށް ހާޟިރުވެވަޑައިގެންނެވި ސުވާލާއި، އެސުވާލާއި ގުޅިގެން ވަޒީރު ދެއްވި ޖަވާބާއި ގުޅިގެން މެމްބަރުން ކުރައްވާ އިތުރު ސުވާލުތައް ކަމަށެވެ. އަދި އެއީ ޤާނޫނުގައި އެކަން ކަނޑައަޅާފައި އޮތް ގޮތް ކަމަށާއި، އެހެން ކަމުން ވަޒީރު ޖަވާބު ދެއްވުމަށް ހާޟިރުވެވަޑައިގެންނެވި، ސުވާލާއި ނުގުޅޭ، އަދި ވަޒީރު ދެއްވި ޖަވާބާއި ނުގުޅޭ ސުވާލުތަކަށް ފުރުޞަތު ނުދެއްވޭނެ ކަމަށެވެ.

މަޖިލީހުގެ ރައީސް އަސްލަމް އެކަން ޢިއުލާނު ކުރެއްވުމަށްފަހުގައި ވެސް، ހޯރަފުށި ދާއިރާގެ މެންބަރު އަޙްމަދު ސަލީމް، މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް އަލްފާޟިލް މުޙައްމަދު ސަޢީދު ކުރެއްވި ސުވާލާއި އެސުވާލަށް މިނިސްޓަރު ދެއްވި ޖަވާބައި ނުގުޅޭ ސުވާލުތައް މެމްބަރުން ވަނީ ކުރައްވާފައެވެ. މެމްބަރުން ކުރެއްވި ނުގުޅޭ ސުވާލުތައް މަޖިލީހުގެ ރިޔާސަތުން ބަލައި ނުގަތުމުން ރައްޔިތުންގެ މަޖިލީހުގެ އެމްޑީޕީގެ ބައެއް މެމްބަރުން ވަނީ އެކަމާއި މެދު ނުރުހުން ފާޅު ކުރައްވާފައެވެ.

މީގެ އިތުރުން ނުގުޅޭ ސުވާލުތައް މެމްބަރުން ކުރައްވަމުން ގެންދަވާތީ، މަޖިލީހުގެ ޤަވާއިދާއި އެއްގޮތަށް އަމަލު ކުރައްވައި އެއްބާރުލުން ދެއްވުމަށް މަޖިލީހުގެ ރައީސް މުޙައްމަދު އަސްލަމް އެދިވަޑައިގެންނެވިއެވެ.

ރައްޔިތުންގެ މަޖިލީހަށް ސުވާލުކުރުމަށް މީގެ ކުރިން ވަޒީރުން ހާޟިރުކުރުމަށް ފަހުގައި، ހާޟިރު ކުރެވުނު ސުވާލާއި ނުގުޅޭ ސުވާލުތައް މެމްބަރުން ކުރުމާއި، އެ ސުވާލުތަކަށް ވަޒީރުން ޖަވާބު ދެއްވުމަށް މަޖިލީހުގެ ރިޔާސަތުން އެންގެވުމަކީ، ޘަޤާފަތެއްގެ ގޮތުގައި ހިނގަމުން އައި ކަމެކެވެ. އަދި ނުގުޅޭ ސުވާލުތައް މެމްބަރުން ކުރައްވާތީ، ވަޒީރުންވެސް އެކަމާއި މެދު ނުރުހުން ފާޅުކުރައްވާފައިވެސް ވެއެވެ.