ވަޒީރުންނަށް މަޖިލީހުން ރުހުން ދީފަިއ ނުވި ނަމަވެސް، ވަޒީރުން މަޖިލީހަށް ހާޟިރުކޮށް ސުވާލު ކުރެވޭނެކަމުގައި ރައްޔިތުންގެ މަޖިލީހުގެ ރައީސް މުޙައްމަދު އަސްލަމް ވިދާޅުވެއްޖެއެވެ.

އަސްލަމް މިހެން ވިދާޅުވީ، ރައްޔިތުންގެ މަޖިލީހުގެ މިއަދުގެ ޖަލްސާގައި، ހޯރަފުށި ދާއިރާގެ މެންބަރު އަޙްމަދު ސަލީމް، މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް އަލްފާޟިލް މުޙައްމަދު ސަޢީދުއާ ކުރެއްވުމަށް ހުށައަޅުއްވާފައިވާ ސުވާލު ކުރެއްވުން ކުރިޔަށް ގެންދިޔުމުގެ ކުރިން ދެއްކެވި ވާހަކަފުޅުގައެވެ.

ޤާނޫނު އަސާސީ އާއި ޤާނުނުތަކަށް ރިޢާޔަތް ކުރައްވައި އަސްލަމް ވިދާޅުވީ، ރައްޔިތުންގެ މަޖިލީހުގެ ރުހުން ލިބުމުގެ ކުރިންވެސް، ވަޒީރުންނަކީ ޤާނޫނާއި އެއްގޮތަށް ހުވާކުރައްވައި ވަޒީރުންގެ މަޖިލީހަށް ރައީސުލްޖުމްހޫރިއްޔާ އަައްޔަނުކުރައްވާފައިވާ މެމްބަރުންކަމުގައި ވާތީ، ވަޒީރުންނަށް މަޤާމުގެ މަސްއޫލިއްޔަތާއި ޒިންމާތައް އުފުއްލެވޭނެ ކަމަށެވެ. އަދި ވަޒީރުންނަށް މަޖިލީހުގެ ރުހުން ނުލިބިއްޖެ ހާލަތެއްގައި އެމެމްބަރުންނަށް ވަޒީރުންގެ މަޖިލީހުގައި ދެމި ނުތިއްބެވޭނެކަމުގައި ކަމުގައިވެސް އަސްލަމް ވިދާޅުވިއެވެ. އެހެން ކަމުން ރުހުންދީފައި ނުވާ ވަޒީރުން، ރައްޔިތުންގެ މަޖިލީހަށް ހާޟިރުވެ މެމްބަރުންގެ ސުވާލުތަކަށް ޖަވާބު ދިނުމަށް ފުރުޞަތު ދެވޭނެ ކަމުގައިވެސް އަސްލަމް ވިދާޅުވިއެވެ.

ވަޒީރުންގެ މަޖިލީހުގައި ހިމެނޭ މެމްބަރުންނަށް ރުހުން ހޯއްދެވުމަށްޓަކައި، ރައީސުލްޖުމްހޫރިއްޔާ މަޖިލީހަށް ހުށައަޅުއްވާފައިވީ ނަމަވެސް، ވަޒީރުންގެ މަޖިލީހުގެ މެމްބަރުންނަށް ރުހުން ދިނުމާއި މެދު މަޖިލީހުން އަދި ގޮތެއް ނުނިންމައެވެ.