އަންނަ އަހަރަށް ލަފާކުރާ، ދައުލަތުގެ ބަޖެޓަށް ބަހުސް ކުރައްވަން ބޭނުންފުޅުވާ ހުރިހާ މެމްބަރުންނަށް ފުރުޞަތުދީ މިއަދު ބަޖެޓު ބަހުސް ނިންމާލުމަށްޓަކައި، ރައްޔިތުންގެ މަޖިލީހުގެ މިއަދުގެ ޖަލްސާގެ ވަގުތު އިތުރު ކުރުމަށް މަޖިލީހުގެ ރިޔާސަތުން ހުށައަޅައިފިއެވެ.

ރައްޔިތުންގެ މަޖިލީހުގެ ރައީސް  މުޙައްމަދު އަސްލަމް، ވިދާޅުވީ، ބަޖެޓު ބަހުސް ނިންމާލުމަށްޓަކައި، މަޖިލީހުގެ ވަގުތު އިތުރުކުރުމަށް ވޯޓަށް އަހާނީ މަޖިލީހުގެ ވޯޓުގަޑީގައި ކަމަށެވެ.

އިއްޔެވެސް ބަޖެޓު ބަހުސް ނިންމާލުމަށް މަޖިލީހުގެ ޖަލްސާގެ ވަގުތު ހަވީރު، 5:00 ހަމައަށް އިތުރު ކުރިއެވެ. އެހެން ނަމަވެސް 3:30 ގައި މަޖިލީހުގެ ރައީސް ޖަލްސާ ނިންމަވާލެއްވީ، ބަޖެޓަށް ބަހުސް ކުރެއްވުމަށް އެދި ވަޑައިގެންނެވި އެއްވެސް މެމްބަރަކު މަޖިލީހުގެ ތަޅުމުގައި އެވަގުތު ނެތުމާއި އެކުގައެވެ.

އިއްޔެގެ ޖަލްސާގައި ބަޖެޓަށް ރައްޔިތުންގެ މަޖިލީހުގެ 19 މެމްބަރުން ބަހުސް ކުރައްވާފައި ވެއެވެ.

ފިނޭންސް މިނިސްޓްރީން ރައްޔިތުންގެ މަޖިލީހަށް ހުށައަޅާފައި ވަނީ، 49.5 ބިލިޔަން ރުފިޔާގެ ބަޖެޓެކެވެ. ބަޖެޓަށް ކޮމިޓީން ގެނައި ބަދަލުތަކާއި އެކު ބަޖެޓުގެ ޖުމުލަ އަދަދު ވަނީ 49.8 ބިލިއަނަށް އަރާފައެވެ.