މަޝްހޫރު ފެޝަން ބްރޭންޑު "ޒާރާ" އިން އެ ކުންފުނީގެ އެންމެ ފަހުގެ ޑިޒައިންތައް ޕްރޮމޯޓުކުރުމަށް ސޯޝަލް މީޑިއާގައި ކުރި ޕޯސްޓްތަކުގައި އިސްރާއީލުން ފަލަސްތީނާ ދެކޮޅަށް ހިންގަމުންދާ ގަތުލުއާންމަށް ހަޖޫޖަހާ، އެކަން ޕްރޮމޯޓްކުރާފަދަގޮތަކަށް ހުރުމުން ފަލަސްތީނަށް ސަޕޯޓުކުރާ ގިނަ ބަޔަކު އެ ބްރޭޑް ބޮއިކޮޓްކުރަން ގޮވާލަމުން އެބަދެއެވެ. އަދި ޒާރާއިން އާންމުކުރި ފޮޓޯތަކާއި، އެ ފޮޓޯތަކާއި ގުޅޭ ފަލަސްތީނުގެ ރައްޔިތުންގެ ހިތްދަތި ހާލަތުގެ އެއްގޮތްކަން ފެންނަ ފޮޓޯތައް ގިނަ ބަޔަކު އަންނަނީ ސޯޝަލް މީޑިއާގައި އާންމުކޮށް، އެކަމާ ނުރުހުން ފާޅުކުރަމުންނެވެ.

އެމެރިކާގެ މޮޑެލް ކްރިސްޓަން މެކްމެނަމީ ބޭނުންކޮށްގެން ހަދާފައިވާ މި އިޝްތިހާރުގައި އެންމެ ގިނަ ބައެއްގެ ނުރުހުން އަމާޒުވީ އޭނާގެ ކޮނޑުމައްޗަށް ހިނަވާފައޮތް ގަބުރެއް ރަމްޒުކޮށްދޭ ބުދެއް ލައިގެން ހުރި ފޮޓޯއެވެ. މީގެ އިތުރުން، އިސްރާއީލުން ފަލަސްތީނަށް ހަމަލާތައް ދިނުމާ ގުޅިގެން ފަލަސްތީނުގެ ރައްޔިތުން އުޅެމުންދާ ހާލަތު ސިފަކޮށްދޭ ގޮތަށް ވެސް މި އިޝްތިހާރުގައި މޮޑެލްކޮށްފައިހުއްޓެވެ.

ޒާރާގެ އިޝްތިހާރާ ގުޅިގެން ސޯޝަލް މީޑިއާގައި މީހަކު ކުރި ޕޯސްޓެއްގައި ބުނީ، އެ ކުންފުނިން އެފަދަ ގޮތަކަށް އިޝްތިހާރެއް ހެދުމަކީ އިއްތިފާގެއް ނޫންކަމަށެވެ. އޭނާ ސިފަކުރީ އެއީ އެމީހުން ގަސްތުގައި ކުރި ކަމެއްގެ ގޮތުގައެވެ.