އެމްޑީޕީގެ ރިޔާސީ ޕްރައިމަރީގައި ނާކާމިޔާބާއި ކުރިމަތިލައްވަން ޖެހިވަޑައިގެންނެވި، ރައީސް ނަޝީދަށް އިންތިޚާބުގައި ވާދަކުރުމުގެ ފުރުޞަތު ހޯދުމަށްޓަކައި އުފައްދާ ޕާޓީގެ ނަމާއި ލޯގޯ އަދި ދިދައަށް ޚިޔާލު ހުށައެޅުމުގެ ފުރުޞަތު ހުޅުވާލައިފިއެވެ.

އެމްޑީޕީގެ ރިޔާސީ ޕްރައިމަރީގައި ރައީސް ނަޝީދަށް ކާމިޔާބު ނުކުރެއްވުމުން އެމަނިކުފާނު އިސްވެ ހުންނަވައި، އެމްޑިޕީގެ ތެރޭގައި ވަނީ "ފިކުރެއްގެ ދިރުން" ގެ ނަމުގައި ވަކި ފެކްޝަނެއް އުފައްދަވާފައެވެ. އެދުވަހުން ފެށިގެންވެސް ރައީސް ނަޝީދު ގެންދެވީ އެމްޑީޕީގައި އެންމެ އިސްކޮށްތިބި  ފަރާތްތަކުގެ އިސްތަށިފުޅުގައި، ތަފާތު އެކި ތުހުމަތުތަކާއި އިލްޒާމްތައް އަޅުއްވައި، އެމަނިކުފާނަށް ރިޔާސީ ޓިކެޓް ލިބޭނެ ގޮތެއް ވޭތޯ މަސައްކަތްޕުޅު ކުރައްވަމުންނެވެ. އަދި ރިޔާސީ އިންތިޚާބުގައި އެމަނިކުފާނުގެ ފެކްޝަނުން ޖުމްހޫރީ ޕާޓީގެ ލީޑަރާއި އެކު މަސައްކަތް ކުރެއްވުމަށް ހުށައަޅުއްވައި، ޤާސިމް އިބްރާހީމްއަށް ރައީސް ނަޝީދު ހުށައެޅުއްވި ހުށައެޅުއްވުންތައް އެމަނިކުފާނުވެސް ޤަބޫލުފުޅު ނުކުރެއްވުމުން، އައު ސިޔާސީ ޕާޓީއެއް އުފައްދަވައިގެން ރިޔާސީ އިންތިޚާބަށް ނުކުންނެވުމަށް ރައީސް ނަޝީދު މިހާރު ވަނީ މަސައްކަތްޕުޅު ފައްޓަވާފައެވެ.

ރައީސް ނަޝީދު އުފައްދަފާފައިވާ ފެކްޝަން ރަސްމީކޮށް އެމްޑީޕީން ވަކިވެ އައު ސިޔާސީ ޕާޓިއެއް އުފެއްދުމުގެ މަސައްކަތް ފަށައިފިކަން އެފިކުރުގެ މަޖިލިސް މެމްބަރުން ހާމަކުރައްވާފައި ވަނީ މިދިޔަ ބުދަ ދުވަހުއެވެ. މިގޮތުން ރައްޔިތުންގެ މަޖިލީހުގައި ހިމެނޭ އެމްޑީޕީގެ 68 މެމްބަރުންގެ ތެރެއިން 12 މެމްބަރަކު ވަނީ އަމިއްލައަށް އެމްޑީޕީން ވަކިވެ އައު ސިޔާސީ ޕާޓީ އުފެއްދުމުގެ މަސައްކަތް ފަށާފައިވާކަން އިޢުލާނު ކުރައްވާފައެވެ.

މިގޮތުން އަލަށް އުފައްދާ ސިޔާސީ ޕާޓީއަށް ނަމެއް ހުށައެޅުމަށާއި، ޕާޓީގެ ކުލައާއި ދިދައަށް ޚިޔާލު ހުށައެޅުމަށް ވަނީ ހުޅުވާލާފައެވެ. މިގޮތުން އެފުރުޞަތު ހުޅުވާލާފައި ވަނީ 21 ޖޫން 2023ވާ އާދީއްތަ ދުވަހުގެ އިރު އޮއްސި 18:00ގެ ނިޔަލަށެވެ.

ރައީސް ނަޝީދަށް ވެރިކަން ހޯއްދަވައި ދެއްވުމަށް އައު ސިޔާސީ ޕާޓިއެއް އުފެއްދުމުގެ މަސައްކަތް "ފިކުރެއްގެ ދިރުން"އިން ފަށާފައި ވާއިރު، "މަވެސް ވަކިވެއްޖައިން" ގެ ނަމުގައި އެމްޑީޕީގައި ތިބި ރައީސް ނަޝިދުގެ ފިކުރުގެ މީހުން އެމްޑީޕީން ވަކިވުމަށް ބާރުއަޅައި ކެމްޕޭނެއްވެސް ދަނީ ހިންގަމުންނެވެ. ރައްޔިތުންގެ މަޖިލީހުގައި ތިއްބެވި އެމްޑީޕީގެ 13 މެމްބަރަކު ފިކުރެއްގެ ދިރުމާއި އެކު އައު ސިޔާސީ ޕާޓިއެއް އުފެއްދުމުގެ މަސައްކަތުގައި ހަރަކާތްތެރިވަމުންދާއިރު، ރައީސް ނަޝީދު އަދިވެސް ހުންނެވީ އެމްޑީޕީގައެވެ.

މުރާސިލުން އަންދާޒާކުރައްވާ ގޮތުގައި ރައީސް ނަޝީދު ފިކުރެއްގެ ދިރުމާއި އެކު ޕާޓީ އުފެދުމުގެ މަސައްކަތުގައި ޢަމަލީގޮތުން ބައިވެރިވަވަޑައި ނުގަންނަވާ މައިގަނޑު ސަބަބަކީ، ރައްޔިތުންގެ މަޖިލީހުގެ ރައީސް ކަމުގެ ގޮނޑި އެމަނިކުފާނަށް ގެއްލިވަޑައިގަންނަވާނެތީއެވެ. މަޖިލީހުގެ ރިޔާސަތުގައި ރައީސް ނަޝިދު އިންނެވީ އެމްޑީޕީގެ މެމްބަރެއްގެ ހައިސިއްޔަތުންނެވެ. ރައީސް ނަޝީދު އެމްޑީޕީން ވަކިވެވަޑައިގެންފި ނަމަ، އެމްޑިޕީގެ މެމްބަރުން ރައީސް ނަޝީދު ރައްޔިތުންގެ މަޖިލީހުގެ ރައީސް ކަމުގެ މަޤާމުން ވަކިކުރައްވާނެއެވެ. ރައީސް ނަޝީދާއި ނުލައި ފިކުރެއްގެ ދިރުމުގައި ތިއްބެވީ ރައްޔިތުންގެ މަޖިލީހުގެ 13 މެމްބަރުންނެވެ. ރައީސް ނަޝީދާއި ނުލައި، އަދި އިދިކޮޅު މެމްބަރުންނާއި ނުލައިވެސް އެމްޑީީޕީއަށް މަޖިލީހުގެ ސާފު އަޣުލަބިއްޔަތު އެބަ އޮތެވެ.