އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާފައިވާ ދައުލަތުގެ ބަޖެޓުގެ ބަހުސް ނިންމާލުމަށްޓަކައި މިއަދު ރައްޔިތުންގެ މަޖިލީހުގެ ވަގުތު އިތުރުކުރުމަށް ފަހުގައިވެސް، އިތުރު މެމްބަރުން ބަޖެޓަށް ބަހުސް ކުރުމަށް އެދިވަޑައިގެންފައިވާތީ، މާދަމާގެ ޖަލްސާގައިވެސް ބަޖެޓް ބަހުސް ކުރިޔަށް ގެންދިޔުމަށް ނިންމައި މިއަދުގެ ޖަލްސާ ނިންމާލައިފިއެވެ.

ރައްޔިތުންގެ މަޖިލީހުގެ ރައީސް މުޙައްމަދު އަސްލަމް މަޖިލީހުގެ މިއަދުގެ ޖަލްސާ ނިންމަވާލައްވަމުން ވިދާޅުވީ، 19 މެމްބަރުން ބަޖެޓަށް ބަހުސް ކުރައްވާފައިވާ އިރު އިތުރު 10 މެމްބަރުންނަށް ފުރުޞަތު ނުލިބި ތިއްބެވި ކަމަށެވެ. އެހެން ނަމަވެސް މިއަދުގެ 3:30 ހާއިރު މަޖިލީހުގެ ޖަލްސާ ނިންމަވާލެއްވީ، ބަޖެޓަށް ބަހުސްކުރެއްވުމަށް އެދިވަޑައިގެންނެވި މެމްބަރުން މަޖިލީހުގެ ތަޅުމުގައި ނެތުމާއި އެކު މާދަމާގެ ޖަލްސާގައި އެމްމެބަރުންނަށް ފުރުޞަތު ދެއްވާނެ ކަން މަޖިލީހުގެ ރައީސް އިއުލާނު ކުރައްވަމުންނެވެ.

ބަޖެޓު ބަހުސް ނިންމާލުމަށް، ޖަލްސާގެ ވަގުތު ހަވީރު 5:00 އާއި ހަމައަަށް އިތުރު ކުރުމަށް ރިޔާސަތުން ހުށައެޅުވުމުން އެގޮތަށް ފާސްކުރުމަށް، ޖަލްސާގައި ބައިވެރިވެވަޑައިގެންނެވި މެމްްބަރުންގެ ތެރެއިން 50 މެމްބަރުން ވޯޓު ދެއްވިއެވެ.

ފިނޭންސް މިނިސްޓްރީން ރައްޔިތުންގެ މަޖިލީހަށް ހުށައަޅާފައި ވަނީ، 49.5 ބިލިޔަން ރުފިޔާގެ ބަޖެޓެކެވެ. ބަޖެޓަށް ކޮމިޓީން ގެނައި ބަދަލުތަކާއި އެކު ބަޖެޓުގެ ޖުމުލަ އަދަދު ވަނީ 49.8 ބިލިއަނަށް އަރާފައެވެ.