ސްޕެއިންގެ ކެޓަލޯނިއާއަށް ނިސްބަތްވާ ބާސެލޯނާ އާއި ޖިރޯނާ ބައްދަލުކުރި މެޗު 4-2 އިން ކާމިޔާބުކޮށް، ރިއާލް މެޑްރިޑް ފަހަތަށް ޖައްސާލުމަށްފަހު ޖިރޯނާއިން ލީގުގެ އެއްވަނައަށް ކުރިޔަށް ޖެހިލައިފިއެވެ.

ޔޫރަޕްގެ ބޮޑެތި ލީގުތަކުގައި އާންމުކޮށް ކުޑަ ޓީމުތައް ސީޒަންގެ ކުރީކޮޅު ރަގަޅު ނަތީޖާތައް ނެރެ، ލީގުގެ މަތިފަޑީގައި އުޅޭތަން ފެނެއެވެ. ނަމަވެސް ލީގުގެ ބޮޑެތި ބާރުތަކާޖެހި، އެ ޓީމުތަކުގެ އަޑު މަޑުމަޑުން ފަނޑުވަމުން ގޮސް އެންމެ ފަހުން ލީގު ނިންމާލާނީ ބޮޑެތި ޓީމުތަކުގެ ފަހަތުންނެވެ. އެންމެނަށް ވެސް ބެލެވުނީ ޖިރޯނާއަށް ވެސް ވާނީ މިފަދަ ގޮތެއްކަމަށެވެ. ނަމަވެސް އެހެނަކުން ނުވިއެވެ. އެމީހުންނަކީ ލީގުގެ ބޮޑެތި ބާރުތަކަށް ނުރައްކަލަކަށްވެއްޖެއެވެ. އެންމެ ފަހުން މި ބަލިކުރީ ލީގުގެ އެންމެ ފަހުގެ ޗެމްޕިއަން ބާސެލޯނާއެވެ.

ރޭގެ މެޗަށް ބަލާއިރު ބާސެލޯނާކޮޅަށް މިހާ ގިނަ ގޯލުތަކެއް ކާމިޔާބު ކުރެވުނު ސަބަބަކީ އެ ޓީމުގެ ޑިފެންސިވް މައްސަލަތަކޭ ބުނުމުގެ ޖާގަ ވަރަށް ބޮޑަށް އެބައޮތެވެ. އެގޮތުން އެ ޓީމުގެ ފްރާންސް ޑިފެންޑަރ ޖޫލްސް ކޮންޑޭއަށް ހެދުނު ބޮޑެތި ގޯސްތަކެއް ރޭގައި ފެނުނެވެ.

މެޗުގެ ކުރީކޮޅު ފުރަތަމަ ލީޑު ނެގީ ޖިރޯނާއިންނެވެ. އޭގެ ކުޑަ ވަގުތު ކޮޅެއް ފަހުން ބާސެލޯނާއިން އެއްވަރުކުރިއެވެ. ނަމަވެސް ފުރަތަމަ ހާފު ނިމުމުގެ ކުރިން ގިރޯނާއިން އަނެއްކާވެސް ލީޑު ނެގިއެވެ. ޖިރޯނާއިން ލީޑު ފުޅާކުރީ މެޗު ނިމެން ކައިރިވެފައިވަނިކޮށެވެ. އެހެންކަމުން އިތުރު ވަގުތުގެ ކުރީކޮޅު ގުންޑޮގަން ޖެހި ގޯލުން މާ ބޮޑު އުއްމީދެއް ބާސެލޯނާއަކަށް ނުލިބުނެވެ. އޭގެ ވަގުތުކޮޅެއް ފަހުން ލެވަންޑޯސްކީއަށް އެއްވަރު ކުރަން ލިބުނު ފުރުސަރު ބޭކާރު ނުވިނަމަ ބާސެލޯނާއަށް މެޗުން ޕޮއިންޓެއް ލިބުމާ ވަރަށް ގާތަށް ދިޔައީހެވެ. ޖިރޯނާއިން މެޗުގެ 3 ޕޮއިންޓު ޔަގީންކުރީ ސްޓުއާނީ އިތުރު ވަގުތުގެ 5 ވަނަ މިނެޓުގައި ޖެހި ގޯލަކުންނެވެ.

މި ނަތީޖާއާއެކީ 41 ޕޮއިންޓާއެކު އެއްވަނައިގައި އޮތީ ޖިރޯނާއެވެ. ލީގުގެ ދެވަނައިގައި އޮތް މެޑްރިޑަށް ލިބިފައިވަނީ 39 ޕޮއިންޓެވެ. އަދި 3 ވަނަ އާއި 4 ވަނައިގައި އޮތް އެތުލެޓިކޯ މެޑްރިޑާއި ބާސެލޯނާއަށް ލިބިފައިވަނީ 34 ޕޮއިންޓެވެ.