މިހާރުގެ ސަރުކާރުން ގެނައުމުގައި މެދުވެރިއަކަށްވި، ކުރީގެ ރައީސް ޢަބުދުﷲ ޔާމީން ޢަބުދުލްޤައްޔޫމް، އެމަނިކުފާނު އިސްވެ ހުންނަވައި އަލަށް އުފައްދަވާ ސިޔާސީ ޕާޓީ، ޕީއެންއެފްއަށް ސޮއިކުރައްވައިފިއެވެ.

އެމަނިކުފާނު ޕީއެންއެފްއަށް ސޮއެކުރައްވާފައި ވަނީ، ރޭ ބޭއްވި ޚާއްޞަ ރަސްމިއްޔާތެއްގައެވެ. މިރަސްމިއްޔާތު ބާއްވާފައި ވަނީ، ޕީއެންއެފްގެ ރަސްމީ އޮފީސް ޤާއިމްކޮށްފައިވާ، ހެންވޭރު ހުރަފައިގައެވެ.

ރައީސް ޔާމީން ޕާޓީގެ އައުޕާޓީ ހެދުމުގު ހުއްދަ އިލެކްޝަންސް ކޮމިޝަނުން ދޫކޮށްފައި ވަނީ އެމަނިކުފާނުގެ ދޮށީ ފިރިހެން ދަރިފުޅު ޒެއިންއަށެވެ.

ރައީސް ޔާމީންގެ އައު ސިޔާސީ ޕާޓީ އުފެއްދެވުމުގައި ޢަމަލީ ގޮތުން އެންމެ އިސްދައުރެއް އަދާކުރައްވަމުން ގެންދަވާ، މުޙައްމަދު މަލީޙް ޖަމާލު ވިދާޅުވީ، ރައީސް ޔާމީން ހުންނެވީ އެއްގޮތަކަށް ވެސް ދޫދެއްވާ ގޮތަކަށް ނޫންކަމަށާއި އެމަނިކުފާނު ހުންނެވީ، ރައްޔިތުންގެ ހައްގުގައި، ދިވެހި ގައުމުގެ ހައްގުގައި، އިސްލާމް ދީނުގެ ހައްގުގައި ސާބިތުކަމާއެކު ދިވެހި ރައްތިރުންނާ އެކު ކުރިއަށް ވަޑައިގަތުމުގެ ފުރިހަމަ އަޒުމާއި ހިތްވަރުގައި ކަމަށް މަލީޙް ވިދާޅުވިއެވެ.

މަލީޙް ވިދާޅުވީ، ޕީޕީއެމް ޕީއެންސީގައި ހުންނަވައި، އެ މަނިކުފާނުގެ ޕާޓީން ވަކާލާތު ކުރި މުހިންމު ކަންތައްތައް މަތިން މި ސަރުކާރު ވަރަށް ބޮޑަށް ހަނދާން ނެތިފައިވާ މަންޒަރު މިހާރު ދަނީ ފެންނަމުން ކަމަށެވެ.

ޑރ. މުޙައްމަދު މުއިއްޒަށް ޕީޕީއެމް ޕީއެންސީގެ ރިޔާސީ ކެންޑިޑޭޓްކަން ދިނީ، ރައީސް ޔާމީނަށް އިންތިޚާބުގައި ވާދަކުރެވޭނެ ހުރިހާ މަގެއް ބަންދުވެގެން ދިޔުމުންނެވެ. އަދި ރައީސް ޔާމީނުގެ ފޮޓޯފުޅު ދައްކައި، އަދި އެމަނިކުފާނުގެ ސަޕޯޓަރުންގެ ތާއީދާއި އެކު ވެރިކަމަށް ވަޑައިގެންނެވުމާއިއެކު މަޤާމުގެ ހުވާ ކުރެއްވުމުގެވެސް ކުރީ، މިސަރުކާރުގެ އިސްވެރިން ވަނީ ރައީސް ޔާމީނާއި ގުޅުން ކަނޑާލައްވާފައެވެ.

ރައީސް ޔާމީން، އެމަނިކުފާނު އަލަށް އުފައްދަވާ ޕާޓީ ޕީއެންއެފްއަށް ސޮއެކުރައްވާފައި މިވަނީ، އެމަނިކުފާނުގެ ވެރިކަމުގައި ޤާނޫނަށް ގެނައި ބަދަލުތަކުގެ ތެރެއިން، ހުކުމެއް ތަންފީޒް ކުރަމުންދާ ފަރާތަކަށް ސިޔާސީ ހަރަކާތްތަކުގައި ބައިވެރި ނުވެވޭ ގޮތަށް ޤާނޫނަށް ބަދަލު ގެނެސްފައި ވަނިކޮށެވެ.