ފުށިދިއްގަރުފަޅުގެ މަޝްރޫއަކީ މިވަގުތަށް ބަަލާއިރު ރައްޔިތުންގެ ފައިސާ އިސްރާފް ކުރުން ކަމުގައި، އެމްޑީޕީގެ ޓިކެޓްގައި މާލެ ސިޓީގެ މޭޔަރުކަމަށް ވާދަކުރައްވާ އާދަމް އާޒިމް ވިދާޅުވެއްޖެއެވެ.

އާޒިމް މިހެން ވިދާޅުވީ، މާލޭ ސިޓީ ކައުންސިލްގެ ބައި އިލެކްޝަނަށް އެމްޑީޕީގެ ރަސްމީ ކެމްޕޭން ފެށުމަށް ބޭއްވި ހަފްލާގައި ވާހަކަފުޅު ދައްކަވަމުންނެވެ.

އާޒިމް ވިދާޅުވީ، ފުށި ދިއްގަރުފަޅު ހިއްކުމުގެ މަޝްރޫޢަކީ، މިވަގުތަށް ބަލާއިރު، ރައްޔިތުންގެ ފައިސާއިން ކުރެވޭނެ އިސްރާފަކަށް ވެގެން ދާނެ ކަމަށެވެ. އަދި އެކަމަށް ވުރެ، މާލެއާ އެއަށްވުރެ ކައިރިން ހިއްކާފައިވާ ބިންތައް އާބާދުކުރުމުގެ މަސައްކަތް ކުރިޔަށް ގެންދިޔުން މާ ރަނގަޅުކަން އާޒިމްގެ ވާހަކަގައި ވަނީ ފާހަގަކުރައްވާފައެވެ. އަދި މާލެ ކައިރީގައި ހުރި އެހެން ބިންތައް ތަރައްޤީ ނުކޮށް އަނެއްކާ އަލުން އާބިމެއް ހިއްކައިގެން ތަރައްޤީކުރާ ނަމަ އެކަން ވާނީ ރައްޔިތުންގެ ފައިސާއިން ކުރެވޭ ބޮޑު އިސްރާފަކަށް ކަންވެސް އާޒިމް ފާހަގަކުރެއްވިއެވެ.

އާޒިމް ވިދާޅުވީ، މާލޭގެ ރައްޔިތުންނަށް ދޭ ޔަގީންކަމަކީ،  ރައީސް އިބްރާހިމް މުހައްމަދު ސޯލިހު ދެއްވި ހުރިހާ ބިންތައް އެ ހުރި ތާކުން ލިބޭނެ ގޮތް ހައްދަވައި ދެއްވުމަށް ކުރެވެން ހުރި ހުރިހާ މަސައްކަތެއް ކުރައްވާނެ ކަމަށެވެ.

މީގެ އިތުރުންވެސް މާލެ ސިޓީގެ ތަރައްޤީއަށްޓަކައި އާޒިމް ވަނީ މުހިއްމު ގިނަ ވަޢުދުތަކެއް ވެވަޑަިއގެންފައެވެ. އާޒިމްއަކީ، މާލޭ ސިޓީގެ މާޔަރުކަމަށް ވާދަކުރައްވާ އެންމެ ޤާބިލް އަދި އެންމެ މަޤުބޫލު ކެންޑިޑޭޓެވެ.