އެސްޓީއޯގެ ސަބްސިޑަރީ ކުންފުނި، އެލައިޑް އިންޝުއަރެންސްގެ މެނޭޖިން ޑިރެކްޓަރުކަމަށް ހުސެއިން ލުވައިޒް ހަމަޖައްސައިފިއެވެ. އެ މަގާމަށް ލުވައިޒް އައްޔަން ކުރިކަން އެސްޓީއޯ ވަނީ ހާމަކުރައްވާފައެވެ.

ލުވައިޒް އެލައިޑާ ގުޅިވަޑައިގަތީ 2002 ވަނަ އަހަރުގައެވެ. އޭނާ އެ ކުންފުނީގެ އެމްޑީގެ މަގާމަށް ހަމަޖެއްސުމުގެ ކުރިން ހުންނެވީ ޖެނެރަލް ކްލެއިމްސް ސެކްޝަންގެ މެނޭޖަރުގެ މަގާމުގައެވެ.

ލުވޭޒްއަކީ އިނގިރޭސި ވިލާތުގެ ޗާޓާޑް އިންޝުއަރެންސް އިންސްޓިޓިއުޓާއި ނިއު ޒިލެންޑްގެ އިންސްޓިޓިއުޓް އޮފް އިންޝުއަރެންސް އެންޑް ފިނޭންސްގެ ސީނިއާ އެސޯސިއޭޓެއްގެ އިތުރުން މެލޭޝިއަން އިންޝުއަރެންސް އިންސްޓިޓިއުޓްގެ އެސޯސިއޭޓެކެވެ.

އެލައިޑް އިންޝުއަރެންސްގެ އެމްޑީގެ މަޤާމުގައި ކުރިން ހުންނެވީ މުހައްމަދު ޝަފާޒެވެ.