"މިނަމާޓާ ކޮންވެންޝަން އޮން މަރކިއުރީ"ގައި ރާއްޖެއިން ބައިވެރިވުމަށް ވަޒީރުންގެ މަޖިލީހުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ލަފާއަރުއްވައިފިއެވެ.

"މިނަމާޓާ ކޮންވެންޝަން އޮން މަރކިއުރީ"އަކީ، ދިރޭރަހަ އެކުލެވޭ އުފެއްދުންތަކުން ބޭރުވާ ނުރައްކާތެރި ވިހަ މާއްދާތަކުން އިންސާނުންގެ ޞިއްޙަތަށާއި ތިމާވެށި ރައްކާތެރިކުރުމުގެ މަޤްޞަދުގައި އދ ގެ ތިމާވެށްޓާބެހޭ ޕްރޮގްރާމް، ޔުނައިޓެޑް ނޭޝަންސް ގެ އެންވަޔަރަންމަންޓް ޕްރޮގްރާމް (ޔުނެޕް) ގެ ފަރާތުން 2013 ވަނަ އަހަރު އެކުލަވާލާފައިވާ ބައިނަލްއަޤްވާމީ މުޢާހަދާއެކެވެ. މިހާތަނަށް 147 ޤައުމަކުން ބައިވެރިވެ ވަނީ ޢަމަލުކުރަން ފަށާފައެވެ.

ވަޒީރުންގެ މަޖިލީހުގެ މިލަފައާއި ގުޅިގެން މި މުޢާހަދާގައި ރާއްޖެއިން ބައިވެރިވުމާއި ގުޅޭ ގޮތުން ރައްޔިތުންގެ މަޖިލީހުގެ ރުހުން ހޯއްދެވުމަށް ރައްޔިތުންގެ މަޖިލީހަށް ހުށައެޅުއްވުމަށް ރައީސުލްޖުމްހޫރިއްޔާ ވަނީ ނިންމަވާފައެވެ.

މި މުޢާހަދާ ތަންފީޒުކުރާއިރު، މުޢާހަދާގެ ދަށުން ޢަމަލުކުރުން ލާޒިމުކުރާ ކަންކަމުގެ ތެރޭގައި ދިރޭރަހަ ހިމެނޭ އާލާތްތައް ދެނެގަނެ އެތަކެތި ބޭނުންކުރުން މުޅިން ހުއްޓާލުމާއި އޭގެ ބަދަލުގައި ބޭނުންކުރެވޭނެ ޢާލާތްތައް ފާހަގަކޮށް، އެތަކެތި ނައްތާލުމުގައި ތިމާވެށްޓަށާއި އިންސާނުންގެ ޞިއްޙަތަށް ރައްކާތެރި މިންގަނޑުތަކަށް އަމަލުކުރުމަށް ބާރުއެޅުން ހިމެނެއެވެ. އަދި އެފަދަ ކަންކަން ތަންފީޒުކުރުމަށް މި މުޢާހަދާގެ ދަށުން މާލީ އެހީ ލިބޭނެއެވެ. މީގެ އިތުރުން މި މުޢާހަދާ ތަންފީޒުކުރުން ވެގެންދާނީ ތިމާވެއްޓަށާއި އިންސާނުންގެ ސިއްހަތަށް ދިރޭރަހައިގެ ސަބަބުން ކުރާ ނޭދެވޭ އަސަރު ކުޑަރުމަށް އެޅޭ މުހިންމު ފިޔަވަޅަކަށް ކަމުގައިވެސް ވަޒީރުންގެ މަޖިލީހުގެ މިއަދު ބައްދަލުވުމުގައި ވަޒީރުން ފާހަގަކުރައްވާފައިވެއެވެ.