ވަޒީރުންގެ މަޖިލީހުގެ ލަފާގެ މަތިން، ތުރުކީގައި ދިވެހިރާއްޖޭގެ އެމްބަސީއެއް ހުޅުވުމަށް ރައީސުލްޖުމްހޫރިއްޔާ ނިންމަވައިފިއެވެ.

ވަޒީރުންގެ މަޖިލީހުގެ ނިންމުންތައް މީޑިއާތަކާއި ހިއްޞާކުރައްވަމުން، ރައީސް އޮފީހުގެ އަންޑަރ ސެކްރެޓަރީ މުހައްމަދު ފިރުޒުލް އަބްދުﷲ ޚަލީލް ވިދާޅުވީ، ތުރުކީ ވިލާތުގައި ރާއްޖޭގެ އެމްބަސީއެއް ޤާއިމްކުރެއްވުމަށް ސަރުކާރުން ނިންމެވީ، އެޤައުމުގައި ދިރިއުޅޭ ދިވެހިންނަށް ކަންކަން ފަސޭހަކޮށް ދެއްވުމަށާއި، ރާއްޖެއާ ތުރުކީ ވިލާތާއި ދެމެދު އޮތް ގުޅުން އިތުރަށް ބަދަހިކުރެއްވުމުގެ ގޮތުން ކަމަށެވެ.

ފިރުޒުލް ވިދާޅުވީ، މިއަދުގެ ތަފާސް ހިސާބުތަކަށް ބަލާއިރު، ފަތުރުވެރިކަމުގެ މަންޒިލެއްގެ ގޮތުގައި ވަރަށް ގިނަ އަދަދެއްގެ ދިވެހިން، ތުރުކީވިލާތަށް ދަތުރުކުރާ ކަމަށާއި، ހަމައެހެންމެ، ވިޔަފާރީގެ އެކި ބޭނުންތަކާއި ތައުލީމުގެ އެކި ބޭނުންތަކަށް ވެސް ތުރުކީވިލާތުގައި ދިރިއުޅޭ ދިވެހިންގެ އަދަދު ދުވަހެއް ދުވަހަކަށް އިތުރުވަމުން އަންނަ ކަމަށެވެ.

އަދި ތުރުކީގައި ދިވެހިރާއްޖޭގެ އެމްބަސީއެއް ޤާއިމުވެގެން ދިޔުމަކީ، އެކަމުގެ ލާބަޔާއި މަންފާ ދެޤައުމަށްވެސް ކުރާނޭ ކަމެއްގެ ގޮތުގައި ފިރުޒުލް ފާހަގަކުރެއްވިއެވެ.

ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ފުރަތަމަ ފުރަމާނަ ދަތުރުފުޅު ކުރައްވާފައި ވަނީ ތުރުކީވިލާތަށެވެ. ނޮވެމްބަރު 26 އިން 29އަށް ކުރެއްވި އެ ދަތުރުފުޅުގައި ތުރުކީގައި ދިރިއުޅޭ ދިވެހިންނާއިއެކު ރައީސުލްޖުމްހޫރިއްޔާ ބޭއްވެވި ބައްދަލު ކުރެއްވުމުގައި، އެމްބަސީއެއް ނެތުމުގެ ދަތިކަމާއި އެކަމުގެ މުހިއްމުކަން، އެބައްދަލުވުމުގައި ބައިވެރިވި ފަރާތްތަކުން ވަނީ ފާހަގަކުރައްވާފައެވެ. އަދި އެބައްދަލުވުމުގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަނީ ތުރުކީ ވިލާތުގައި ރާއްޖޭގެ އެމްބަސީއެއް ކައިރި މުސްތަޤުބަލެއްގައި ޤާއިމްކުރެވިގެންދާނޭ ކަމުގެ ޔަޤީންކަން އެބައްދަލުވުމުގެ ބައިވެރިންނަށް ދެއްވާފައެވެ.