ޒަކާތުގެ ހައުސްގެ ނަމުގައި ވަކި އިދާރާއެއް އުފެއްދުމަށް ސަރުކާރުން ނިންމަވައިފިއެވެ.

މިގޮތަށް ނިންމަވާފައި ވަނީ މިއަދު ބޭއްވި ވަޒީރުންގެ މަޖިީހުގައި އެކަމާއި ގުޅޭ ގޮތުން މަޝްވަރާކުރެއްވުމަށްފަހުގައި ކަމަށް ރައީސުލްޖުމްހޫރިއްޔާގެ އޮފީހުން ވަނީ ހާމަކުރައްވާފައެވެ.

ވަޒީރުންގެ މަޖިލީހުގެ ނިންމުންތަކާއި ގުޅޭ މައުލޫމާތު މީޑިއާތަކަށް ޙިއްޞާ ކުރައްވަމުން، ންޑަ ސެކްރެޓަރީ ފޯ ޕަބްލިކް ޕޮލިސީ މުހައްމަދު ފިރުޒުލް އަބްދުﷲ ޚަލީލު ވިދާޅުވީ، ޒަކާތުގެ ހައުސްގެ ގޮތުގައި ވަކި އިދާރާއެއް އުފެއްދެވުމުގެ ބޭނުމަކީ ޒަކާތުގެ ކަންކަން މިހާރަށް ވުރެ ހަރުދަނާ ކުރެއްވުމެވެ. 

ފިރުޒުލް ވިދާޅުވީ، ޒަކާތުގެ ހައުސްގެ ނަމުގައި ވަކި އިދާރާއެއް އުފެއްދުމުގެ ބޭނުމަކީ ޒަކާތް ލިބޭ މިންވަރު އަދަދު އިތުރު ކުރެއްވުމާއި ޒަކާތް ހައްޤުވާ މީހުންނަކީ، ޒަކާތް ދައްކާ މީހުންނަށް ވުމަށް އެފަރާތްތަކުގެ ތަނަވަސްކަން އިތުރު ކުރުމަށް އެހީތެރިވެދިނުން ކަމަށެވެ.

ޒަކާތާއި ބެހޭ ކަންކަން މިހާތަނަށް ހިންގަމުން އައިސްފައި ވަނީ އިސްލާމިކް މިނިސްޓްރީގެ ވަކި ޑިޕާޓްމެންޓެއްގެ ގޮތުގައެވެ. އެހެން ނަމަވެސް ޒަކާތު ހައުސް އުފެއްދެވުމުން އެމަސައްކަތް ބަދަލުވެގެން ދާނީ އެ އިދާރާއަށެވެ.