އދ. ގެ އާންމު މަޖިލީހުން ފާސްކޮށްފައިވާ، ޔުނިވާސަލް ޑެކްލަރޭޝަން އޮން ހިއުމަން ރައިޓްސްއަށް މެމްބަރު ޤައުމުތަކުން ޢަމަލު ކުރަންފެށިތާ 75 އަހަރު ފުރުމާއި، ރާއްޖޭގެ ހިއުމަންރައިޓްސް ކޮމިޝަނަށް 20 އަހަރު ފުރުން ފާހަގަކުރުމުގެ ގޮތުން ޚާއްޞަ ފޮޓޯ މައުރަޒެއް ފަށައިފިއެވެ.

އިއްޔެ ފެށި މި މައުރަޒުގެ ތީމަކީ، "ލެންސް އޮން ހިއުމަނިޓީސް ޖާނީ"އެވެ. ރާއްޖޭގައި ހުންނަ އދ.ގެ އޮފީހާއި، ރާއްޖޭގެ ހިއުމަން ރައިޓްސް ކޮމިޝަން ގުޅިގެން ބާއްވާ މި ފޮޓޯ މައުރަޒު، މި ޑިސެމްބަރު މަހުގެ 18 ވަނަ ދުވަހާއި ހަމައަށް ކުރިޔަށް ދާނެކަމުގައި އެޗްއާރްސީއެމުން ހާމަކުރައްވައެވެ.

މި މައުރަޒުގައި ބެހެއްޓިފައިވާ ކޮންމެ ފޮޓޯއަކުން ބަޔާންކޮށްދޭނީ، އިންސާނީ ހައްޤުތަކުގެ ދަތުރުގެ ތަފާތު ބާބެއް ކަމަށާއި، އިންސާނިއްޔަތާއި ފަންނުވެރިކަމާއި ގުޅިފައިވާ ގުޅުން މައުރަޒުން ފެނިގެންދާނެ ކަމުގައި އެޗްއާރްސިއެމްއިން ވަނީ ބުނެފައެވެ.

މި މައުރަޒު ހުޅުވުމަށް އިއްޔެ ބޭއްވި ރަސްމިއްޔާތުގައި ވަނީ، ސްކޫލްތަކުގައި ގާއިމްކޮށްފައިވާ ހިއުމަން ރައިޓްސް ކްލަބްތަކަށް، އެޗްއާރްސީއެމްގެ ފަރާތުން ތަޢާރަފްކުރި ދެ އެވޯޑެއް ފުރަތަމަ ފަހަރަށް ދީފައެވެ. މިއީ "ބެސްޓް ހިއުމަން ރައިޓްސް ކްލަބް" އާއި "ޔަންގް ހިއުމަން ރައިޓްސް އެޑްވޮކޭޓް" ނަަމުގައި ތަޢާރަފްކުރި ދެ އެވޯޑެެވެ.