ދަރިފުޅުގެ އުފަންދުވަހުގެ ހަދިޔާކަމަށް ބުނެ ޣައްޒާގެ އިމާރާތެއް ގޮއްވާލި ޔަހޫދީ ސިފައިންގެ މީހާ ހަމާސްގެ މުޖާހިދުންގެ ހަމަލާއެއްގައި މަރުވެއްޖެކަން އިޒްރޭލުން ކަށަވަރުކޮށްދީފިއެވެ.

ޣައްޒާގެ ތެރެއަށް ވަދެފައިވާ އިޒްރޭލު ސިފައިންގެ ތެރޭގައި ހިމެނޭ، މާސްޓަރ ސާޖަންޓް އިޔާލް މެއީރް އޭނާގެ 2 އަހަރުގެ އަންހެން ދަރިފުޅުގެ 2 ވަނަ އުފަންދުވަހުގެ ހަދިޔާއެއް ކަމަށް ބުނެ ޣައްޒާގެ އިމާރާތެއް ގޮއްވާލައި އެމަންޒަރު ވީޑިއޯކޮށް އާއްމު ކުރިއެވެ. އޭނާ އެކަން ކޮށްފައި ވަނީ މިމަހުގެ ކުރީކޮޅުގައެވެ.

އިޒްރޭލުގެ އަސްކަރިއްޔާއިން ހާމަކޮށްފައިވާ ގޮތުގައި، މާސްޓަރ ސާޖަންޓް އިޔާލް މެއީރްގެ އިތުރުން، ސާޖަންޓް މޭޖަރ ކޯބީ ދުވަޝްވެސް އިއްޔެ ހަމާސްގެ މުޖާހިދުން ދިން ހަމަލާތަކުގައި ވަނީ މަރާލާފައެވެ.

ޣައްޒާއަށް އަރައި އިޒްރޭލު ސިފައިން ކުރަމުންދާ ހަނގުރާމައިގައި އިޒްރޭލުގެ ގިނަ އަދަދެއްގެ ސިފައިންވެސް ދަނީ މަރުވަމުންނެވެ. މިހަނގުރާމައިން ކާމިޔާބު ލިބިއްޖެކަން ދެއްކުމަށާއި ހަމާސްގެ ހަނގުރާމަވެރިން އަތުލައިގަނެވިއްޖެކަން ދެއްކުމަށް ފާއިތުވި ދެ ދުވަހު އިޒްރޭލު ސިފައިން ދަނީ ޣައްޒާގެ އާއްމުންގެ ތެރެއިން އެތައް ބަޔަކު ހައްޔަރު ކުރަމުންނެވެ.