ތާރުއަޅައިގެން ޒަމާނީ ފެންވަރަށް އަމީނި މަގު ހެދުމުގެ މަޝްރޫޢުގެ ދަށުން މިހާތަނަށް ނުނިމި އޮތް ދެ ސެގްމެންޓްގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ)އިން ފަށައިފިއެވެ.

އަމީނީ މަގުގެ 12 އަދި 13 ވަނަ ސެގްމެޓްޓަކީ، ހައުސިންގ މިނިސްޓްރީ ކުރިމަތިން ހުޅަނގަށް ގޮސް ބޮޑުތަކުރުފާނު މަގާއި ހަމަށް އެ މަގު ނިމޭ ހިސާބެވެ. އެމަގު ހެދުމުގެ މަސައްކަތް ފަށައި މިއަދު ހެނދުނު ވަނީ، މަގުގައި ކުރިން އަޅާފައިވާ ގާތައް ނެގުމުގެ މަސައްކަތް ފަށާފައެވެ.

މިއަދު ހަދަންފެށި އަމީނީ މަގުގެ ފަހު ދެ ސެގްމެންޓް ހިމެނޭ ސަރަހައްދަކީ، މާލޭގެ ޕަބްލިކް ޓްރާންސް ޕޯޓުގެ މައި ރޫޓަކަށް ވާތީ، މަގު ހެދުމުގެ މަސައްކަތަށް އެސަރަހައްދު ބަންދު ކުރުމާއި އެކު، ބަސް ދަތުރު ކުރާ ރޫޓަށް ވަނީ ބަދަލު ގެނެސްފައެވެ.

އަމީނީ މަގަކީ މީގެކުރިން އަޑިގުޑަންތަކާއި ހެދި މަގު ބޭނުންކުރާ މީހުންނަށް ބޮޑެތި ތަކުލީފުތަކާއި ކުރިމަތިވެފައިވާ މަގެކެވެ. ނަމަވެސް ތާރުއަޅައިގެން ޒަމާނީ ފެންވަރަށް ތަރައްޤީކުރުމުގެ ސަބަބުން މަގު ބޭނުންކުރާމީހުންނަށް ވަނީ ބޮޑެތި ލުއިފަސޭހަތަކެއް ލިބިގެންގޮސްފައެވެ.

އަމީނީ މަގު ޒަމާނީ ފެންވަރަށް ތަރައްޤީކުރުމުގެ މަސައްކަތް ހަވާލުކުރީ 84.4 މިލިއަން ރުފިޔާއަށެވެ.