އަމީނީ މަގުގެ ނުނިމި އޮތް ބައިގައި ތަރުއެޅުމުގެ މަސައްކަތް ފެށުމުން އެމްޓީސީސީގެ ބަސް ރޫޓަށް ބައެއް ބަދަލުތައް ގެނެސްފިއެވެ. އާރުޑީސީން ބުނީ އަމީނީ މަގުގެ ސެގްމަންޓް 12 އަދި 13 ހެދުމުގެ މަސައްކަތް ފަށާފައިވާ ކަމަށެވެ.

އެމްޓީސީސީން ބުނީ އަމީނީ މަގުގެ މަސައްކަތް ނިމެންދެން މިއަދުން ފެށިގެން މާލޭގައި އާރްޓީއެލް ބަސް ދުއްވާ ރޫޓުތަކަށް ބައެއް ބަދަލުތައް ގެނެސްފައިވާ ކަމަށެވެ.

• އަމީނީ ރޫޓްގެ ދަތުރުތައް ދެން ކުރާނީ އަމީނީ މަގުން ގޮސް ހަނދުވަރީ ހިނގުމަށް އެޅުމަށް ފަހު، އެ މަގުން މަޖީދީ މަގަށް އަޅައިގެން.

• އޯކިޑް ރޫޓްގެ ދަތުރުތައް ދެން ކުރާނީ މަޖީދީ މަގުން ގޮސް ވެސްޓް ޕާކް ބަސް ސްޓޮޕުން އަނބުރާލާ ގޮތަށް.

• ހުޅުމާލެ އާއި މާލެއާ ދެމެދު ދަތުރު ކުރާ ބަސްތަކުގެ ދަތުރު ފަށާ އަދި ނިމޭ ބަސް ސްޓޮޕަކީ މާފަންނު ބަސް ޓާމިނަލް.

އަމީނީ މަގާއި އިއްޒުންދީން މަގާ ގުޅޭ ހިސާބަށް ތާރު އެޅުމަށް ފަހު މަސައްކަތް މެދުކަނޑާލީ މިދިޔަ ސެޕްޓެމްބަރު މަހު ބޭއްވި ރިޔާސީ އިންތިހާބުގެ ފުރަތަމަ ބުރާ ދިމާކޮށެވެ.

މަސައްކަތް އަލުން ފެށުމަށް ފުލުހުން ވަނީ އެ ސަރަހައްދުގެ ޓްރެފިކަށް ވެސް ބައެއް ބަދަލުތައް ގެނެސްފައެވެ.

އެ ސަރަހައްދަކީ އަމީނީ މަގުގެ އެންމެ ބާރުބޮޑު އެއް ސަރަހައްދެވެ. އެހެންވެ، އާންމުންނަށް ދަތިނުވާނެ ގޮތަށް މަސައްކަތް ފެށުމަށް އާރުޑީސީއާ އެކު ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީން ހާއްސަ މަޝްވަރާ ބައްދަލުވުމެއް ވެސް ބޭއްވިއެވެ.

ދައުލަތުގެ ބަޖެޓުން 84 މިލިއަން ރުފިޔާ ހަރަދުކޮށްގެން އަމީނީ މަގު ހެދުމުގެ މަސައްކަތް ފެށީ މިދިޔަ އަހަރު ޖުލައި މަހުގެ ކުރީކޮޅެވެ.