ރައީސުލްޖުމްހޫރިއްޔާގެ ރަސްމީ ގެކޮޅު، މުލީއާގެ -- ފޮޓޯ: އަދުނާން ހަލީމް
ރިޔާސީ ގަނޑުވަރުގައި ވަޒީފާއަދާކުރަމުން ދިޔަ ތެލަސީމިއާ ކުއްޖަކު ބަލަހައްޓާ އެކަނިވެރިމަޔަކު ވަޒީފާއިން ވަކިކޮށްފި
ރައީސުލްޖުމްހޫރިއްޔާގެ ރަސްމީ ގެކޮޅު މުލީއާގޭގައި ވަޒީފާ އަދާކުރަމުން އައި މުވައްޒަފުންގެ ތެރޭގައި ހިމެނޭ، ތެލަސީމިއާ ކުއްޖަކު ބަލަހައްޓާ އެކަނިވެރި މަޔަކު އޭނާ ހުރި ވަޒީފާއިން ވަކިކޮށްފިއެވެ.
އެއަންހެންމީހާ އާއި އަދިވެސް ރިޔާސީ ގަނޑުވަރުގައި މަސައްކަތްކުރާ އިތުރު ބަޔަކު މިސަރުކާރުން ވަޒީފާއިން ވަކިކޮށްފައިވާކަން ހާމަކުރެއްވީ، ކުރީގެ ފަސްޓްލޭޑީ ފަޒްނާ އަޙްމަދު އެކަމާގެ ފޭސްބުކް ޕޭޖުގައި ލިޔުއްވި ޕޯސްޓެއްގައެވެ.
އެކަމަނާ ވިދާޅުވެފައިވާ ގޮތުގައި، ވަޒީފާއިން ވަކިކުރި އަންހެން މީހާއަކީ، ރިޔާސީ ގަނޑުވަރުގެ ދާއިމީ ވަޒީފާގައި ހުރި އަދި، ވަޒީފާގެ މަސްއޫލިއްޔަތުތަކާއި ޒިންމާތައް ރަނގަޅަށް އުފުލަމުން އައި އަދި މަސައްކަތާއި ގުޅޭ ސިއްރުތައްވެސް ހިފަހައްޓާފައިވާ މީހެކެވެ. މިގޮތުން އޭނާއަކީ ރައީސުލްޖުމްހޫރިއްޔާގެ ރަސްމީ ގެކޮޅުގައި މަސައްކަތްކުރާ މުވައްޒަފެއްކަން އޭނާގެ ގާތް ރައްޓެހިންނަށްވެސް ނޭނގޭ ވަރަށް އޭނާ ސިއްރު ހިފަހައްޓާކަން ކުރީގެ ފަސްޓްލޭޑީ ފާހަގަކުރައްވާފައިވެއެވެ. ވަޒީފާއިން ވަކިކުރި އެ އަންހެންމީހާއަކީ، ރައީސުލްޖުމްހޫރިއްޔާގެ ރަސްމީ ގެކޮޅު މުލީއާގޭގެ ހައުސްކީޕިންގ އިންޗާޖްގެ ވަޒީފާއަދާކުރަމުން ގެންދިޔަ މީހެކެވެ.
މީގެ އިތުރުން، ނިމުނު ހަފްތާގައި އިތުރު ދެ ދިވެހި މުވައްޒަފުން، މުލީއާގޭގެ ވަޒީފާއިން ވަކިކޮށްފައިވާ ކަމަށާއި އޭގެ ތެރޭގައި، މުލީއާގޭގެ ކައްކާއެއްގެ ވަޒީފާއި ހުރި ދިވެހި ފިރިހެނަކާއި، އަދި ބަދިގޭގައި މަސައްކަތްކުރާ އަންހެން މުވައްޒަފަކުވެސް ހިމެނޭ ކަމުގައި ކުރީގެ ފަސްޓް ލޭޑީ ފަޒްނާ އަޙްމަދު ހާމަކުރައްވާފައިވެއެވެ.
ކުރީގެ ފަސްޓްލޭޑީ ފަޒްނާގެ ޕޯސްޓްގައި ފާހަގަކުރައްވާފައިވާ ގޮތުގައި، 2018 ވަނަ އަހަރުން ކުރީގެ ރައީސުލްޖުމްހޫރިއްޔާގެ ދެކަނބަލުން މުލީއާގެއަށް ދިރިއުޅުން ބަދަލު ކުރެއްވި އިރުވެސް، މުލީއާގޭގައި ކައްކާއިންނާއި ވޭޓަރުންގެ ގޮތުގައި ރައީސް ނާސިރާއި، ރައީސް މައުމޫނުގެ ޒަމާނުން ފެށިގެން ވަޒީފާއަދާކުރަމުން އައި މީހުން ތިބި ކަމަށެވެ. އަދި އެމީހުން ކުރީގެ ސަރުކާރުގައި ވަޒީފާތަކުން ކަނޑާނުލާކަން ކުރީގެ ފަސްޓްލޭޑީގެ ޕޯސްޓްގައި ފާހަގަކުރައްވާފައިވެއެވެ