ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު -- ފޮޓޯ: ރައީސް އޮފީސް
ކޮރަޕްޝަން އުފަންވާ ހާއްޔަކީ ހުދު ގިރުވާނު ކަމަށް ބުނެވޭ: ރައީސް
ކޮރަޕްޝަން އުފަންވާ ހާއްޔަކީ ހުދު ގިރުވާނު ކަމަށާއި، ކޮރަޝަންގެ ކުށަކީ ހުދު ގިރުވާނުލީ ގިންތީގެ ކުށެއް ކަމަށް ބުނެވޭކަމުގައި ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ބައިނަލްއަޤްވާމީ އެންޓި-ކޮރަޕްޝަން ދުވަސް ފާހަގަކުރުމަށް ބޭއްވި ޖަލްސާގައި ވާހަކަފުޅު ދެއްކެވި ވާހަކަފުޅުގައެވެ.
ކޮރަޕްޝަންގެ އަމަލުތައް އުފެދޭ ގޮތާއި އެކަމާއި ގުޅޭ ގޮތުން ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ، ނަހަމަގޮތުގައި ނުފޫޒު ފޯރުވުމުގެ ކުށް ހިނގަނީ ސިޔާސީގޮތުންނާއި މާލީ ގޮތުން މަތީ ދަރަޖައަކަށް ދެވިފައިވާ މީހުންގެ މެދުގައި ކަމަށް ބުނެވޭ ބުުނުން ނިސްބަތްވަނީ ހުދު ގިރުވާނަށް ކަމަށެވެ.
ރައީސުލްޖުމްހޫރިއްޔާ ވިދާޅުވީ، ކޮރަޕްޝަނަށް ނޫނެކޭ ބުނުމަކީ، ތިމާގެ އަމިއްލަ ނަފްސާ ހަމައިން ފަށަންޖެހޭ ކަމެއް ކަމަށެވެ.
ރައީސުލްޖުމްހޫރިއްޔާގެ ވާހަކަފުޅުގައި، ކޮރަޕްޝަނާއި ދެކޮޅަށް ބައިނަލް އަޤުވާމީ ގޮތުން ފާހަގަކުރާ ދުވަހުގެ ޝިއާރު، ދުނިޔެއިން ކޮރަޕްޝަން ނައްތާލުމުގައި އެއްބައިވުމުގެ މައްޗަށް އަލިއަޅުއްވާލައްވައި ވިދާޅުވީ، އެޝިޢާރުން އެނގެނީ، ކޮރަޕްޝަނާ ދެކޮޅަށް މަސައްކަތް ކުރުމުގައި މުޅި ދުނިޔެ އެކައްޗަކަށްވުމާއި، ކޮރަޕްޝަނާ ދެކޮޅަށް މުޅި ދުނިޔެ ތެދުވަންޖެހޭކަންކަމަށެވެ.
ބައިނަލްއަޤުވާމީ ގޮތުން ފާހަގަކުރާ ކޮންމެ އަހަރެއްގެވެސް އެންޓި ކޮރަޕްޝަން ދުވަހަކީ، ޑިސެމްބަރު މަހުގެ 9 ވަނަ ދުވަހެވެ.