ޗައިނާގެ ޒިލިންގ ގޯލްޑް މައިންގައި 580ޓަނުގެ ރަން ހުންނާނެކަމަށް އެޤައުމުގެ ނޫސްތަކުން ރިޕޯޓްކޮށްފިއެވެ.

ޗައިނާގައި ރަންނަގާ ޒިލިންގ ގޯލްޑްމައިން ހުންނަނީ، އިރުމަތީ ޗައިނާގެ ޝަންޑޮންގް ޕްރޮވިންސްގެ ލައިޒޫގައެވެ. މިރަންވަޅުގައި 580 ޓަނުގެ ރަން ހުންނާނެ ކަމަށް މިހާރު އަންދާޒާ ކުރެވިފައިވާ އިރު، މިއީ ޗައިނާގެ އެންމެ ބޮޑު ރަންވަޅަށް ވާނެ ކަމަށް ވަނީ ޔަޤީން ކުރެވިފައެވެ.

ޝަންޑޮންގް ޕްރޮވިންސްގެ ނެޗުރަލް ރިސޯސް ޑިޕާޓްމަންޓުން ދާދި ފަހުންބުނެފައި ވަނީ އެ މައިންގެ ތެރެއިން އިތުރު 200 ޓަނުގެ ރަނުގެ ރިޒާވެއް ފެނިފައިވާ ކަމަށާއި އެރަންވަޅުގައި ހުރި ރަނުގެ އަދަދު ޖުމުލަ 580 ޓަނަށް އަރާނެކަމަށް އަންދާޒާ ކުރެވޭ ކަމަށެވެ. އެއީ ޗައިނާގެ ފައިސާއިން ބަލާނަމަ 200 ބިލިއަން ޔުއާންއެެވެ.

2023 ވަނަ އަހަރުގެ ފުރަތަމަ ކުއާޓަރުގައި ޗައިނާއިން 84.97 ޓަނުގެ ރަން ނަގާފައިވާއިރު، މިއީ އޭގެ ކުރީ އަހަރާ އަޅާބަލާއިރު 1.88 އިންސައްތަ އިތުރުވުމެކެވެ.