މާލޭ ސިޓީގައި ގޮވާމުގެ ބާވަތްތަކުން ފިޠުރު ޒަކާތް ބަހަންފަށައިފިއެވެ.

މިނިސްޓްރީ އޮފް އިސްލާމިކް އެފެއާޒުން ވިދާޅުވީ، ފިޠުރު ޒަކާތް ބެހުން ކުރިޔަށްދާނީ، މިއަދާއި މާދަމާ، މާލޭގައި މަޖީދިއްޔާ ސްކޫލާއި ޞަލާޙުއްދީން ސްކޫލުގައި ކަމަށެވެ. 

ގޮވާމުގެ ބާވަތްތަކުން ފިޠުރު ޒަކާތް ބެހުމުގެ މަސައްކަތް މިއަދު ފަށާފައި ވާއިރު، އެމިނިސްޓްރީން ވިދާޅުވީ އިއްޔެއިން ފެށިގެން، ބަނޑޭރި ޕޭ ފިޔަވައި އެހެން އޮންލައިން ޕްލެޓްފޯމްތައް މެދުވެރިކޮށް ފިޠުރު ޒަކާތް ބަލައިގަތުން މެދު ކަނޑާލާފައިވާ ކަމަށެވެ. އަދި ބަނޑޭރި ޕޭ މެދުވެރިކޮށް ރަމަޟާން މަހުގެ އެންމެ ފަހު ދުވަހުގެ އިރު އޮއްސި 18:00 އާއި ހަމައަށް ޒަކާތް ބަލައިގަންނަމުންދާނެ ކަމުގައިވެސް އެމިނިސްޓްރީން ވިދާޅުވިއެވެ.

މިނިސްޓްރީ އޮފް އިސްލާމިކް އެފެއާޒުން ހާމަކުރައްވާފައިވާ ގޮތުގައި މި ރަމަޟާން މަހުގެ 25 ވަނަ ދުވަހުގެ ނިޔަލަށް ފިޠުރު ޒަކާތުގެ ގޮތުގައި، 6.1 މިލޔަން ރުފިޔާ ވަނީ، ލިބިފައެވެ. މިދިޔަ އަހަރުގެ އެއް މުއްދަތުގައި ފިޠުރު ޒަކާތުގެ ގޮތުގައި ދައްކާފައި ވަނީ، 5.9 މިލިޔަން ރުފިޔާއެވެ.