އަމީނީމަގު ހެދުމުގެ މަސައްކަތުގެ ތެރެއިން ނުނިމި އޮތް ދެ ސެގްމެންޓްގެ މަސައްކަތް ހޮނިހިރު ދުވަހު ފެށުމަށް ހަމަޖައްސާފައިވާ ކަމުގައި، ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ)އިން ބުނެފިއެވެ.

އެކުންފުނިން ބުނީ، އަމީނީ މަގުގައި ތާރު އެޅުމުގެ މަސައްކަތުގެ ތެރެއިން މިހާރު ނުނިމި އޮތް ސެގްމެންޓް 12 އަދި 13 ގެ މަސައްކަތް ފެށުމަށްޓަކައި، ވާންޖެހޭ ތައްޔާރީތައް ވަމުންދާ ކަމަށެވެ. އަދި މިގޮތުން އެސަރަހައްދުގެ ޓްރެފިކަށް ގެނެވޭ ބަދަލުތައް، ކަމާއި ބެހޭ ފަރާތްތަކާއި ގުޅިގެން ހިއްޞާކުރާނެ ކަމުގައި އާރްޑީސީން ވަނީ ބުނެފައެވެ.

ކުރީ ސަރުކާރުގެ ދައުރުގައި އަމީނީ މަގުގެ މަސައްކަތް މުޅިން ނިންމާލުމަށް މަސައްކަތް ކުރި ނަމަވެސް ބައެއް ސަބަބުތައް މެދުވެރިވެގެން އެމަގުގެ އެންމެ ފަހު ދެ ސެގްމެންޓްގެ މަސައްކަތް އޮތީ ނުނިމިއެވެ. އަދި އަމީނީމަގު ހެދުމުގެ މަސައްކަތުގެ ތެރެއިން ނުނިމި އޮތް ދެ ސެގްމެންޓްގެ މަސައްކަތް އަވަށް ނިންމުމަާއި ގުޅޭ ގޮތުން، ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީން، ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ)އިން މިހަފްތާގައި ވަނީ މަޝްވަރާކޮށްފައެވެ.

އަމީނީ މަގަކީ މީގެކުރިން އަޑިގުޑަންތަކާއި ހެދި މަގު ބޭނުންކުރާ މީހުންނަށް ބޮޑެތި ތަކުލީފުތަކާއި ކުރިމަތިވެފައިވާ މަގެކެވެ. ނަމަވެސް ތާރު އަޅައި ޒަމާނީ ފެންވަރަށް ތަރައްޤީކުރުމުގެ ސަބަބުން މަގު ބޭނުންކުރާ މީހުންނަށް ވަނީ ބޮޑެތި ލުއިފަސޭހަތަކެއް ލިބިގެންގޮސްފައެވެ.

އަމީނީ މަގު ޒަމާނީ ފެންވަރަށް ތަރައްޤީކުރުމުގެ މަސައްކަތް ހަވާލުކުރީ 84.4 މިލިއަން ރުފިޔާއަށެވެ.