ޕީޕީއެމް/ޕީއެންސީގެ ޓިކެޓުގައި މަޖިލިސް އިންތިޚާބުގައި ވާދަކުރުމުގެ ފުރުސަތު އެ ކޯލިޝަނުން ހުޅުވާލައިފިއެވެ. ޕްރޮގްރެވިސް ކޮންގްރެސް ކޯލިޝަނުން ނެރުނު ބަޔާނެއްގައި ބުނީ އެ ކޮންގްރެސްގެ 2 ޕާޓީގައި ހިމެނޭ މެންބަރުންގެ ތެރެއިން މަޖިލިސް އިންތިހާބުގައި ވާދަކުރަން ބޭނުންވާ މެންބަރުންނަށް މިއަދުން ފެށިގެން މިމަހުގެ 11 ވާ ހޯމަ ދުވަހުގެ އިރުއޮއްސި 6 ޖެހުމާއި ހަމައަށް އެ ފުރުސަތު ހުޅުވާލާފައިވާކަމަށެވެ. 

ކޯލިޝަންގެ ޓިކެޓްގައި މަޖިލިސް އިންތިހާބުގައި ވާދަކުރައްވާ ކެނޑިޑޭޓުންގެ މެދުގައި ޕްރައިމަރީއެއް ބާއްވަންޖެހޭނަމަ ޕްރައިމަރީ މިމަހުގެ 23 ވަނަ ދުވަހުގެ ހެނދުނު 10 އަކުން ހަވީރު 4 އަކަށް ބާއްވަން ހަމަޖެހިފައިވާކަމަށެވެ. އަދި ޕްރައިމަރީގައި ވާދަކުރާ ކެނޑިޑޭޓުންގެ ނަންތައް ތަރުތީބުކުރާނީ ފޯމު ހުށައަޅާ ތަރުތީބުންކަމަށް ވަނީ ބުނެފައެވެ. 

ޓިކެޓަށް ޝައުގުވެރިވާ ފަރާތްތަކުގެ ހުންނަންޖެހޭ ޝަރުތުތައް: 

- 10 ޑިސެމްބަރ 2023 ވަނަ ދުވަހުގެ ނިޔަލަށް ކޯލިޝަންގައި ހިމެނޭ ޕާޓީއެއްގެ ރަޖިސްޓްރީގައި ހިމެނިފައިވުން.

- ޕާޓީގެ ފަރާތުން އިންތިހާބުގައި ވާދަނުކުރެވޭގޮތައް އެއްވެސް ފިޔަވަޅެއް އަޅާފައިނުވުން.

- ޤާނޫނު އަސާސީއާއި ގާނޫނުތަކުން ބުނާ ޝަރުތުތައް ހަމަވުން.

އިތުރު ކަންކަމަށްވެސް ބަލާނެ. އެއީ:

- އަބުރުވެރި ނަޒާހަތްތެރި ފަރާތެއްކަމުގައި ވުން. 

- މަޖިލީހާއި ހާއްސަ މަޖިލީހުގެ ތަޖުރިބާ ލިބިފައިވާ މިންވަރު.

- ޤާނޫނު އަސާސީއާއި ޤާނޫނުތަކަށް ފަރިތަ މިންވަރު.

- ޕާޓީއަށް ހިދުމަތް ކޮށްފައިވާ މިންވަރު.